2015 թվականի դեկտեմբերի 24-ին Հայաստանի չեմպիոնի կոչման համար պայքարող «Ուլիս» ֆուտբոլային ակումբի գլխավոր մարզիչ Գագիկ Սիմոնյանը ձերբակալվել էր «պայմանավորված խաղեր» կազմակերպելու կասկածանքով: Ավելի քան 3,5 տարի Գագիկ Սիմոնյանը պայքարել է ապացուցելու համար, որ ինքն այդպիսի բան չի արել եւ իր ձերբակալությունն ու ներկայացված մեղադրանքը միանգամայն անհիմն են: Նա դեռ անցած տարվա սեպտեմբերին «Սպուտնիկ» Արմենիա մուլտիմեդիոն մամուլի կենտրոնում ԶԼՄ-ների հետ հանդիպման ժամանակ էր խոսել այդ մասին եւ հայտարարել, որ պայքարելու է մինչեւ վերջ:
Այսօր Գագիկ Սիմոնյանը նույն մամուլի կենտրոնում լրատվամիջոցներին պատմեց այս ընթացքում իր կրած տառապանքների, հաղթահարած խնդիրների մասին եւ հայտարարեց, որ դատարանը գործը կարճել է, իսկ 2019 թվականի մայիսի 24-ին Հայաստանի ֆուտբոլի ֆեդերացիան իրեն արդարացրել եւ որ ինքը մտադիր է վերադառնալ ֆուտբոլ:
Իր կամքից անկախ՝ Գագիկ Սիմոնյանը շուրջ 3,5 տարի հեռու է եղել ֆուտբոլից, սակայն ՀՖՖ-ն որոշում է կայացրել դիմել ՈՒԵՖԱ՝ նրան վերադարձնելու մարզչական «A» կարգի լիցենզիան:
Ֆուտբոլային մեկնաբան Խաչիկ Չախոյանը, որն այն ժամանակ «Ուլիսում» աշխատել է Գագիկ Սիմոնյանի հետ, ասաց, որ իր տեղեկություններով՝ Հայաստանի բարձրագույն խմբի առաջնության մասնակից ակումբներից մեկն արդեն Սիմոնյանին իր մոտ տեսնելու ցանկություն է հայտնել: «Ես ուրախ եմ, որ արդարությունը հաղթեց: Երբեք չեմ կասկածել Գագիկ Սիմոնյանի անմեղությանն ու մաքրությանը: Սակայն պիտի ասեմ նաեւ, որ ծուխն առանց կրակի չի լինում: «Ուլիսի» հետ կապված նման դեպք եղել է: Սակայն հարցն այն է, թե ով է, ինչպես եւ ինչքան է արվել: Ուղղակի, գուցե, թիմի ղեկավարությունից ինչ-որ մեկին պետք էր պատժել առանց գործը մանրակրկիտ ուսումնասիրելու, եւ այդ մեկը դարձավ Գագիկ Սիմոնյանը: Ես ուրախ եմ, որ հիմա լուսատախտակի վրա գրանցվել է 10:0՝ հօգուտ Գագիկ Սիմոնյանի»:
Կարդացեք նաև
Ինքը՝ մարզիչը, շնորհակալություն հայտնեց ՀՖՖ ղեկավարությանը՝ Արթուր Վանեցյանին, Արմեն Մելիքբեկյանին, Արմեն Նիկողոսյանին, որ լսեցին իրեն եւ վստահեցին: Ասաց նաեւ, որ իր անունն ու հեղինակությունը մինչեւ վերջ մաքրելու համար անելու է հնարավոր ամեն բան, որպեսզի այդ կեղտոտ գործարքի կազմակերպիչներն ու իրական մասնակիցները բացահայտվեն ու պատժվեն:
Աշոտ ՀԱԿՈԲՅԱՆ
