Ադրբեջանի իշխանությունները պետք է հանեն մեղադրանքները լրագրող Անար Մամեդովի վրայից և թույլ տան նրան ազատ աշխատել: Այս մասին ասվում է «Լրագրողների պաշտպանության կոմիտեի» (CPJ) հայտարարության մեջ:
Հունիսի 4-ին Criminal.az անկախ կայքի գլխավոր խմբագիր Անար Մամեդովը կբողոքարկի իր դատավճիռը կեղծ լուրերի, հակապետական գործունեության և այլ մեղադրանքներով, որի համար նա մարտի 18-ին հինգուկես տարվա պայմանական ազատազրկման էր դատապարտվել:
Ինքը՝ Մամեդովը, CPJ-ին հայտնել է, որ մեղադրանքները կապված են Criminal.az-ի 2018թ. հուլիսի հրապարակման հետ՝ կապված ամբողջ երկրի տարածքում էլեկտրականությունն անջատելու և Գյանջայի քաղաքապետի սպանության հետ:
2018թ. հուլիսի 9-ին Բաքվի ոստիկանությունը ձերբակալեց Մամեդովին և նրա դեմ մեղադրանք առաջադրեց հակապետական հայտարարություններ անելու, իր մասնագիտական լիազորությունները չարաշահելու, կեղծումների և «կեղծ տեղեկատվություն հրապարակելու» մեջ: Մարտի 18-ին դատարանը նրան մեղավոր ճանաչեց:
Կարդացեք նաև
Մամեդովը CPJ-ին հայտնել է, որ նույն օրը, երբ իրեն մեղադրանք է առաջադրվել, Criminal.az-ն արգելափակվել է Ադրբեջանի տարածքում: Այժմ այն Ադրբեջանում հասանելի է միայն VPN-ով:
Ադրբեջանի գլխավոր դատախազությունը չի պատասխանել CPJ-ի հարցմանը:
Պատրաստեց՝ Վիկտորյա ԱՆԴՐԵԱՍՅԱՆԸ
