Այսօր կեսօրից Արագածավանի 150-ից ավելի հողօգտագործողներ փակել են Գյումրի տանող միջպետական ճանապարհը՝ պահանջելով վերանայել ոռոգման ջրի սակագները: Նրանց խոսքով՝ մեկ հեկտարը ջրելու համար մոտ 100 հազար դրամ են ծախսում՝ այն էլ այս ռիսկային գյուղատնտեսության պայմաններում: Ասում են՝ ոռոգման ջրի սակագինը պետք է իջեցնել, որպեսզի գյուղացիները հազարներով ջրի պարտք չկուտակեն:
Այս պահին միջպետական ճանապարհի երթեւեկությունը դադարեցված է: Բեռնատարները շարված են եւ չեն կարողանում անցնել:
Գյուղացիների խոսքով՝ Ջրօգտագործողների միավորումը որոշել է ոռոգման ջրի դիմաց գործող հեկտարի փոխարեն գանձվող գումարը հաշվարկել ըստ լիտրի, ինչի պարագայում սակագինը շատ ավելի կբարձրանա։
Արագածավանին ոռոգման ջուր է մատակարարում Թալինի ՋՕՄ-ը:
Ըստ հողօգտագործողների՝ դիմել են Ջրային տնտեսության պետական կոմիտեին, որտեղից, ի պատասխան, նշել են, որ այդ հարցն իրենց չի առնչվում:
Ցուցարարների բողոքին արձագանքել են ՋՕՄ-ի պատասխանատուները՝ նշելով, որ հունիսի 3-7-ը հանձնաժողով է կազմվելու, որտեղ էլ կհաշվեն կորուստները եւ կորոշեն ջրի սակագինը:
Սակայն հողօգտագործողները չեն համաձայնում այս տարբերակին:
Լուսինե ԲՈՒԴԱՂՅԱՆ
