«Իմ քայլը» խմբակցության պատգամավոր Արտաշես Պետրոսյան այսօր ԱԺ-կառավարություն հարցուպատասխանի ժամանակ գործադիրի ուշադրությունը հրավիրեց այն փաստի վրա, որ Արագածավանի բնակիչներն այսօր փակել են միջպետական ճանապարհը եւ երկաթուղին՝ պահանջելով ոռոգման ջրի սակագնի վերանայում:
Տարածքային կառավարման եւ զարգացման նախարար Սուրեն Պապիկյանը պատասխանեց. «Իմացա մամուլից խնդրի մասին: Սա երրորդ դեպքն է: Նախորդ դեպքերում Ջրային կոմիտեի աշխատակիցները տեղում քաղաքացիների հետ հարցը քննարկել են՝ փորձելով լուծումներ գտնել: Ինչ վերաբերում է բնակիչների պահանջին, ապա նշեմ, որ ոռոգման ջրի գումարի կեսը սուբսիդավորում է պետությունը, եւ ոռոգման ջրի միջինացված գինը 22 դրամ է: Գյուղացին ոռոգման ջուրը ստանում է 11 դրամով: Իսկ խորքային հորերի դեպքում, երբ ջուրը «հանվում» է էլեկտրաէներգիայի՝ պոմպերի աշխատանքի միջոցով, տարբեր համայնքներում մեկ խ/մ ոռոգման ջրի գինը հասնում է 150 դրամի: Երբեմն՝ 200-ի: Հիմա մշտադիտարկում ենք անում, որպեսզի ջրի ամբողջական հոսքը վերահսկելի լինի, արհեստական կորուստները՝ կառավարելի»:
Սուրեն Պապիկյանը տեղեկացրեց, որ ջրօգտագործողների ընկերություններում էլ ստուգումներ են արվում, խախտումներ կան եւ հարուցված քրեական գործեր. «Իսկ արագածավանցիներին խնդրում եմ բացել ճանապարհը եւ քննարկումները տեղափոխել ՀՀ ջրային կոմիտե: Եթե եղել են չարաշահումներ, կարող ենք քննարկել եւ հասկանալ: Իսկ եթե ամեն ինչ կարգին է, եւ ընդամենը ցանկություն կա ջրի սակագինն իջեցնելու, ներկայում կառավարությունն ի վիճակի չէ: Եթե մի տեղ սակագինն իջնի, ամբողջ հանրապետությունում պետք է իջնի, մինչդեռ Ջրային կոմիտեն 20 միլիարդ դրամի պարտք ունի»:
Կարդացեք նաև
Լուիզա ՍՈՒՔԻԱՍՅԱՆ
