«Իմ քայլը» խմբակցության ղեկավար Լիլիթ Մակունցն ասել էր, որ ամիսներ շարունակ վեթինգի գործընթացի հետ կապած օրենսդրական քննարկումներ են եղել: Այսօր լրագրողների հետ զրույցում ԱԺ նախագահ Արարատ Միրզոյանը, հարցին՝ ընդդիմությունը բողոքում է, թե ինչո՞ւ եք դուք դա գաղտնիք պահել, իրենց այդ քննարկումներին մասնակից չեք դարձրել՝ պատասխանեց. «Տիկին Մակունցը նկատի է ունեցել ավելի լայն՝ անցումային արդարադատության տարբեր գործիքների մասին քննարկումները: Իսկապես, մենք այդ մասին ամիսներ շարունակ քննարկումներ ենք ունեցել: Խոսքը մի թեմայի մասին է, որը մեծամասամբ անծանոթ է եղել լայն հանրությանը, նույնիսկ քաղաքական շրջանակներին, նույնիսկ մասնագիտական շրջանակներին: Մենք մեծ հաշվով կարողացել ենք ծանոթանալ նրան, ինչն անվանում են անցումային շրջանի կամ անցումային արդարադատություն, այդ թվում եւ վեթինգի գործիքին եւ հիմա արդեն որոշումներ կայացնելու ժամանակն է»: Նա ասաց, որ նախ փորձել են հասկանալ, թե ինչ գործիքն ինչ ազդեցություն կարող է թողնել:
Խոսելով ապրիլյան պատերազմի հետ կապված հետաքննող հանձնաժողովի մասին, Միրզոյանն ասաց, որ այդ հանձնաժողովի աշխատանքների արդյունքները չեն կարող կանխորոշել, կարող է այնպիսի նրբերանգներ բացահայտվեն… «Հիմա կոնկրետ վերնագիր չկա, կարող է այնպիսի ասպեկտի մասին լինի առաջարկությունը՝ ստեղծել քննիչ հանձնաժողովը, որ որեւէ մեկի մոտ տարակուսանք չառաջանա»:
Միրզոյանը հայտարարեց՝ «Սա գործիք չի որեւէ մեկի նկատմամբ հաշվեհարդար տեսնելու: Բայց վարչապետը նկատի է ունեցել, որ կան բազմաթիվ հարցեր՝ այդ թվում եւ ապրիլյան պատերազմի հետ կապված առնչվող կամ հարակից հարցեր, որոնց հանրությունը պիտի տեղյակ լինի»:
Aravot.am-ի հարցին՝ մտավախություն չկա՞, որ բանակին հնարավոր է վնաս լինի՝ Միրզոյանը պատասխանեց. «Ընդհանրապես ամեն ինչի հետ կապված էլ մտավախություն կա: Բայց այդ տրամաբանությամբ մենք կարող ենք ընդհանրապես տանից դուրս չգալ, որովհետեւ մտավախություն կա, որ կարող է ճանապարհին ավտովթար լինի»:
Կարդացեք նաև
Հռիփսիմե ՋԵԲԵՋՅԱՆ
