«Անկախ նրանից՝ Սահմանադրական դատարանը կվերացնենք, թե ոչ, դրա գործառույթը սահմանադրական վերահսկողությունն է, եւ այն առկա է: Ուստի համաձայն չեմ տեսակետի հետ, թե ՍԴ-ն պետք է վերացնել, որովհետեւ գոյություն ունեն դատական իշխանության կառույցներ եւ գործառույթներ»,-ԱԺ ամբիոնից այսօր պատգամավորների հետ հարցուպատասխանի ժամանակ հայտարարեց ՀՀ նախագահի կողմից Սահմանադրական դատարանի անդամի թեկնածու առաջադրված՝ սահմանադրագետ, իրավաբան Արթուր Վաղարշյանը:
Նրա բնորոշմամբ՝ Սահմանադրության սկզբունքներից մեկն ասում է, որ դատական համակարգի օղակները պետք է կառուցվածքային առումով անջատ լինեն. «Միշտ չէ, որ բոլոր գործառույթների կենտրոնացումը մեկ մարմնում ճիշտ է: ՍԴ դերը մեծ եմ համարում՝ սահմանադրականության եւ սահմանադրական օրինականության ապահովման հարցում»:
«Իմ քայլը» խմբակցության պատգամավոր Գեւորգ Պապոյանը հետաքրքրվեց, թե ՍԴ անդամի թեկնածուն ինչ տեսակետ ունի վերջերս քաղաքացիների՝ դատարանները շրջափակելու գործողության մասին: Արթուր Վաղարշյանը պատասխանեց, որ հանրության ճնշումը դատարանների հանդեպ պետք է լինի օրենքի շրջանակներում, եւ, օրինակ, դատավորին պատուհանից քաշել-հրելը ճիշտ չէ: Գեւորգ Պապոյանը չհամաձայնեց. «Նման իրավիճակ չկար, դատավորն ինքն է ընկել: Ժողովուրդը խաղաղ կանգնել է դատարանների առաջ: Որեւէ ապօրինություն չի եղել»:
Կարդացեք նաև
Արթուր Վաղարշյանն ուղղեց պատգամավորին. «Իշխանությունը պատկանում է ժողովրդին, բայց անգամ ժողովուրդը պետք է ղեկավարվի իր իսկ ընդունած սահմանադրությամբ»:
Լուիզա ՍՈՒՔԻԱՍՅԱՆ
Լուսանկարը՝ Արթուր Վաղարշյանի ֆեյսբուքյան էջից
