ԱԻՄ նախագահ Պարույր Հայրիկյանն այսօր Հանրապետության հրապարակում հանդիպեց լրատվամիջոցների հետ:
«Մեր ժողովրդի կյանքում մայիսի 28-ը բացառիկ դերակատարություն է ունեցել: Մենք հիմա վերադառնում ենք Էջմիածնից, որտեղ այցելության էինք գնացել Գեւորգ Կաթողիկոսի շիրիմին: Նա այն անձն է, ով, ըստ էության, նախապատրաստեց այն ազգային համախմբումը եւ այն ոգին, որով մենք կերտեցինք Սարդարապատը: Այսպիսի դրվագ է եղել. այն ժամանակ խորհրդարանները կոչվում էին ազգային ժողով: Ազգային ժողովից պատվիրակություն է գնացել Էջմիածին եւ Կաթողիկոսին առաջարկել է Էջմիածինը թողնել եւ տեղափոխվել Բյուրականի ամառանոց, քանի որ թուրքական զորքերն առաջանում են, արդեն հասել են Սարդարապատ: Իսկ Արարատյան դաշտավայրի բնակչությանը տրամադրված են եղել տեղափոխել Գեղարքունիք: Գեւորգ Կաթողիկոսի խոսքերը մոտավորապես այսպիսի բովանդակությամբ՝ եթե հայ զինվորը չի կարող պաշտպանել Էջմիածինը, ապա ես ինքս զինվոր կդառնամ եւ երջանիկ կլինեմ Էջմիածնի պատերի տակ զոհվելուս համար: Այս խոսքերն անմիջապես արձագանքվում են, տարածվում ամբողջ Արարատյան դաշտավայրով:
Պատվիրակությունը նաեւ գալիս զեկուցում է Ազգային ժողովին, կարծում եմ, Երեւանյան խորհրդարանին, այնուհետեւ հնչեցվում են բոլոր եկեղեցիների զանգերը, ու այդպես կերտվում է Սարդարապատը: Սարդարապատը կերտողներն ընդամենն ինքնապաշտպանական կռիվ էին մղում, սակայն բոլորիս համար ակնհայտ է, որ այդպես Հայաստանը փաստորեն վերակերտեց իր անկախությունը», – ասաց Պարույր Հայրիկյանը:
Աշոտ ՀԱԿՈԲՅԱՆ
