Այսօր ՀՀ ոստիկանապետ Վալերի Օսիպյանը Սարդարապատում լրագրողների հետ զրույցում հարցին՝ դատարաններն արգելափակելու ցույցը դուք ինքնաբուխ էիք համարել, որը քննադատության առարկա դարձավ, դուք իսկապես կարծում եք, որ վարչապետի կոչից հետո այդ հավաքն ինքնաբո՞ւխ էր՝ պատասխանեց. «Ո՞ւմ կողմից քննադատվեց: Շտապ հավաք էր: Իսկ որտե՞ղ է գրված, որ դա շտապ հավաք չէր: Ստեղծված իրադարձության շուրջ անհրաժեշտ էր շտապ հավաք: Բայց ի՞նչ կապ ունի ում կողմից է, Հավաքների ազատության մասին օրենքով նշված չի՝ վարչապետն իրավունք ունի՞, թե՞ դուք իրավունք չունեք: Այնտեղ գրված չի: Շտապ հավաքը մնում է շտապ հավաք»:
Դիտարկմանը, որ գործադիրը ճնշում է դատական իշխանությանը, այս համատեքստում է ընկալվում՝ Օսիպյանը պատասխանեց. «Դուք որտե՞ղ եք ճնշում տեսել: Ես չեմ կարող ինձ իրավունք վերապահել վարչապետի գործողություններն այստեղ մեկնաբանել»:
Հարցին՝ ի՞նչ կասեք, եթե վեթթինգի ենթարկվեն նաեւ ոստիկանները՝ նա պատասխանեց. «Խնդիր չկա, թող իրականացնեն: Ոնց որոշվի»:
Երբ լրագրողները հիշեցրին՝ տարիներ շարունակ մենք տեսել ենք քաղաքացիների նկատմամբ ոստիկանական բռնությունները, ճնշումները, զոհված զինծառայողների ծնողների հետ կապված նկարահանումներ կան, բազմաթիվ դեպքեր՝ Օսիպյանը պատասխանեց. «Համակարծիք չեմ ձեր հետ, որ ոստիկանությունը բռնություն է գործադրել: Եթե պահի տակ բռնություն է գործադրել, այնպես չի, որ պետք է ամիսներ, տարիներ անցնեն եւ ինչ-որ վեթինգի ենթարկվեն: Լինում ե դեպք՝ լինում է ծառայողական քննություն»: Իսկ թե ինչ արդյունք են տալիս այդ քննության արդյունքները՝ Օսիպյանը պատասխանեց. «Տեղեկացեք»:
Կարդացեք նաև
Օսիպյանը հաստատեց տեղեկությունը, որ Քոչարյանի խափանման միջոցը փոխած դատավորը՝ Դավիթ Գրիգորյանը ոստիկաններով է շրջում: Հարցին՝ վտանգ կա՞ իր անվտանգության համար, նա պատասխանեց. «Վտանգը իրենք են որոշում, գրությունով դիմել են ոստիկանությանը, մենք պարտավոր էինք ապահովել»:
Հռիփսիմե ՋԵԲԵՋՅԱՆ
