Այսօր փոխվարչապետ Տիգրան Ավինյանը Ապարանում մասնակցում էր Հանրապետության տոնին: Լրագրողները Ավինյանից հետաքրքրվել են՝ ի՞նչ կարծիք ունի օրերս տեղի ունեցած բողոքի ցույցի եւ ակտիվիստ Ջիվան Աբրահամյանի մասին, երբ Արցախի նախագահի նկատմամբ սպառնալիքներ էին հնչեցնում:
«Ղալլաթ էին անում»,-հարցին այսպես է արձագանքել Ավինյանը:
Լրագրողների հարցին՝ իրավապահ մարմինների անգործություն արդյոք չի՞ տեսնում, փոխվարչապետը պատասխանել է. «Ես տեսել եմ կոնկրետ գործողություններ»:
Ճշտմանը՝ տվյալ անձն ազատության մեջ է, Ավինյանը պատասխանել է. «Պետք է արդեն բանտարկվե՞ր, վճի՞ռ է կայացվել, դատարանը մեղավո՞ր է ճանաչել ու պետք է դատապարտվի՞: Կարծում եմ, պետք է համապատասխան քննություն լինի եւ քննության արդյունքները ցույց կտան, թե ինչ կլինեն»:
Կարդացեք նաև
Արդյոք այդ ցույցերը հատուկ կազմակերպվում են իշխանության դեմ, այս հարցին ի պատասխան էլ փոխվարչապետն ասել է. «Ես այդ դավադրությունների տեսություններին հիմնականում չեմ հավատում, եւ շատ դեպքերում, երբ մեզ թվում է, որ պայմանավորվածություններ կան, ստվերային ինչ-որ գործարքներ կան՝ շատ մեծ հավանականությամբ դա որոշ մարդկանց ինքնագլուխ որոշումներն են, չմտածված, ոչ խորապես վերլուծած, եւ ոչ այնքան լավ հետեւանքներ ունեցող»:
Փոխվարչապետից նաեւ հետաքրքրվել են, թե հիմա ինչ կարծիք ունեն դատարանների մուտքերը փակելու գործողությանը, դա բավականին կոշտ արձագանք ստացավ: Ավինյանը պատասխանել է. «Կարծում եմ, դատարաների, դատավորների եւ համակարգի հետ կապված մենք շատ անելիքներ ունենք եւ Հայաստանում հասարակությունը չունի բավարար վստահության աստիճան դատարանների նկատմամբ: Դա մեծագույն խնդիրներից մեկն է ոչ միայն գործադիր իշխանության համար, այլ ամբողջ համակարգի կայացման եւ ժողովրդի համար»:
Մամուլում տեղեկություններ կան, որ հանդիպում եք նախկին իշխանության ներկայացուցիչների հետ, լրագրողի այս դիտարկմանն էլ Ավինյանը պատասխանել է. «Այդ տեղեկությունները սուտ են»:
Հստակեցմանը՝ հանդիպումներից մեկի մասնակիցն է ասել, որը նաեւ նախկին իշխանության ներկայացուցիչ է, Ավինյանը պատասխանել է. «Գաղափար չունեմ, որ հանդիպումների մասին է խոսքը, բայց ընդհանուր առմամբ, բոլոր հանդիպումները, որոնք ես կազմակերպում եմ, աշխատանքային բնույթ են կրում»:
Պատրաստեց՝ Նելլի ԲԱԲԱՅԱՆԸ
