«Շատ նշանակալից է մեր եւ մեր կոլեկտիվի համար,որ Արցախի մեր գործընկերների հետ միասին այս գեղեցիկ սպորտային միջոցառումն անցկացրինք, ինչի առթիվ նաեւ շնորհավորում եմ մեր եւ «ԱրցախԷներգո» ընկերությունների կոլետիվներին»,-այսօր Հայաստանի
ֆուտբոլի ակադեմիայում ասաց Հայաստանի էլեկտրական ցանցեր (ՀԷՑ) ընկերության գլխավոր տնօրեն Կարեն Հարությունյանը: Ակադեմիայում անցկացվեց Հայաստանի Առաջին Հանրապետության տոնին նվիրված Ֆուտզալի մրցաշար: Պարոն Հարությունյանի խոսքով, ՀԷՑ-ը մեծ նշանակություն է տալիս նման միջոցառումներին եւ թե՜ ընկերության տարբեր մասնաճյուղերի միջեւ եւ թե՜ Արցախէներգոյի գործընկերների միջեւ այդպիսի շփումները բերում են փոխադարձ առավել ճանաչման, աշխատանքի արդյունավետության բարձրացման, հայրենասիրական ոգու բարձրացման եւ բոլորի մոտ բարի հիշողություններ են մնում:
Մրցաշարի հաղթող ճանաչվեց ՀԷՑ ՓԲԸ-ի Կենտրոն տարածքային համակարգման տնօրինության «Կենտրոն ՏՀՏ» թիմը՝ 2:1 հաշվով պարտության մատնելով ՀԷՑ-ի Վարչական ապարատի «Վարչապարատ» թիմին: Երրորդ տեղը զբաղեցրեց Շիրակի մարզի Գյումրու մասնաճյուղի «Ղարս» թիմը: Հաղթող թիմը ստացավ 1 միլիոն դրամ մրցանակ, երկրորդ տեղը՝ 700 հազար, 3-րդ տեղի հաղթողին տրվեց 500 հազար դրամ: Մրցանակներ էին սահմանվել նաեւ այլ անվանակարգերում՝ լավագույն ռմբարկու, լավագույն դարպասապահ,լավագույն խաղացող եւ այլն:
Կարդացեք նաև
Արցախէներգո ընկերության գլխավոր տնօրեն Անդրանիկ Խաչատրյանը նույնպես դրական է գնահատում այսպիսի մրցաշարերի կազմակերպումը՝ նշելով, որ նման միջոցառումները համակարգի աշխատակիցներին հնարավորություն են տալիս միմյանց ավելի մոտիկից եւ խորը ճանաչել: Ըստ նրա, չնայած տարբեր հանրապետություններում են գործում, բայց՝ միեւնույն համակարգում են:
«Հայաստանի էլեկտրական ցանցեր» ընկերության Արհեստակցական կազմակերպության նախագահ, մրցաշարի կազմկոմիտեի նախագահ Արտյոմ Մուրադյանի տվյալներով, մրցաշարը կազմակերպելու բոլոր ծախսերը՝ հագուստից սկսած, ճանապարհածախսով ու կեցության ծախսերով վերջացրած, հոգացել է Հայաստանի էլեկտրական ցանցեր ընկերությունը:
«Մեր ընկերությունում առողջ ապրելակերպին մեծ ուշադրություն են դարձնում: Մենք արդեն 12 տարի է անկախության տոնին նվիրված մեծ սպարտակիադաներ ենք կազմակերպում՝ 9 մարզաձեւերով, բայց ՀԷՑ-ը մեծ ուշադրություն է դարձնում ֆուտզալի մրցաշարերին: Այս տարի մրցաշարն անցկացվեց մայիսի 25-27-ը: Մասնակցել են 11 թիմ՝ երեքը Երեւանից, յոթը՝ մարզերից, մեկ թիմն էլ՝ Արցախից»:
«Արարատ-73»-ի հայտնի ֆուտբոլիստ Խորեն Հովհաննիսյանը, որը նույնպես մասնակցում էր միջոցառմանը, ողջունելով ՀԷՑ-ի նախաձեռնությունը, այլ կազմակերպություններին եւս կոչ արեց նույնպես միանալ եւ միասին կերտել մեր երկրում ֆուտբոլի ապագան: Խորեն Հովհաննիսյանն ասաց, որ հետեւել է մրցաշարի խաղերին եւ կարող է ասել, որ թիմերն օր օրի զարգացում են ապրում:
Հաղթած թիմի ֆուտբոլիստ Ժորա Նազարյանի համոզմամբ, այսպիսի մրցաշարերը ընկերության աշխատակիցներին միմյանց հետ շփումների հնարավորություն ընձեռելուց բացի, նաեւ առողջ ապրելակերպ են քարոզում:
Լուսինե ԲՈՒԴԱՂՅԱՆ
