Ինչպես հայտնել ենք, այսօր ԱԺ գիտության կրթության, մշակույթի սփյուռքի, երիտասարդության եւ սպորտի հարցերի հանձնաժողովի նիստում քննարկում էր կազմակերպվել «Գրագողության դեմ պայքարի օրենսդրական հնարավոր լուծումները» թեմայով: Հիմքում դատավոր Ազարյանի հետ կապված աղմուկ բարձրացրած հարցն էր:
Բարձրագույն որակավորման կոմիտեի նախագահ Սմբատ Գոգյանը հայտարարել էր, որ Ալեքսանդր Ազարյանը 160 էջանոց իր ատենախոսության առնվազն 17 էջը արտագրել է Վերաքննիչ դատարանի նախագահ Վազգեն Ռշտունու ատենախոսությունից, ընդ որում, ատենախոսության ղեկավարը երկուսի դեպքում էլ նույն մարդն է եղել:
Այսօր այս առնչությամբ լրագրողների հետ զրույցում Վազգեն Ռշտունին ասաց. «Ես Ալեքսանդր Ազարյանի գիտական աշխատանքին չեմ տիրապետում, բայց իմ իմանալով, ինչքանով տեղյակ եմ, իմ եւ Ալեքսանդր Ազարյանի գիտական ղեկավարը նույն անձնավորությունն է եղել ու այդ նույն անձնավորությունը լինելով թե՛ իմ, թե՛ նրա ղեկավարը, ես չեմ բացառում, որ մտքերի համընկնում կարող է լինել»:
Հարցին՝ խոսե՞լ եք Ազարյանի հետ՝ նա չհերքեց, որ խոսել է. «Ես Ազարյանի հետ երկար չեմ քննարկել տվյալ հարցը, որովհետեւ չեմ համարում Ալեքսանդր Ազարյանին այն անձին, ով կօգտագործեր իմ միտքը՝ հօգուտ իրեն: Ասեմ ավելին՝ այն ժամանակ, երբ մենք դարձել ենք գիտությունների թեկնածու, ինչքան հիշում եմ, 2005-ին ես Ալեքսանդր Ազարյանին չեմ ճանաչել: Նրան ճանաչել եմ, երբ մենք միասին աշխատել ենք Երեւանի քրեական դատարանում, այսինքն, Ալեքսանդր Ազարյանը, ինձ չճանաչելով, չէր կարող իմ միտքն օգտագործել: Ես չեմ ուզում մեկնաբանել, բայց միգուցե մոռացել է հղումը տա էդ մարդը»:
Հռիփսիմե ՋԵԲԵՋՅԱՆ
