Այսօր «Իմ քայլը հանուն Սյունիքի մարզի» ներդրումային բիզնես համաժողովին, որին մասնակցում էր նաեւ վարչապետ Նիկոլ Փաշինյանը, մարզպետի խորհրդական Գոռ Թադեւոսյանը ներկայացրեց Սյունիքի օդանավակայանի վերագործարկման ծրագիրը:
Թադեւոսյանը հիշեցրեց, որ դեռեւս խորհրդային տարիներին Կապանի օդանավակայանից դեպի Երեւան օրական 10-12 կանոնավոր չվերթ էր իրականացվում, իսկ երբ Երեւանում ֆուտբոլային օրեր էին, չվերթները հասնում էին 16-ի:
2017 թվականին Սյունիքի զարգացման եւ ներդրման հիմնադրամը Կապանի օդանավակայանի վերագործարկման համար, ըստ Թադեւոսյանի, հիմնել է «Սյունիքի օդանավակայան» ՍՊԸ-ն, որի մասնակիցներն են «Զանգեզուր» պղնձամոլիբդենային կոմբինատ» բարեգործական հիմնադրամն ու Սյունիքի զարգացման եւ ներդրման հիմնադրամը: Ապա Կապանի համայնքապետարանի ու Սյունիքի զարգացման եւ ներդրման հիմնադրամի միջեւ կնքվել է կոնցեսիոն կառավարման պայմանագիր, որով նախատեսվում էր վերանորոգել եւ վերագործարկել օդանավակայանը։
Այս օդանավակայանի ուղեւորային համալիրի մակերեսը նախկին 160 քմ-ի փոխարեն, ինչպես Թադեւոսյանը վստահեցրեց, նախատեսվում է, որ կլինի 900 քմ, սպասարկման հնարավորությունը 1 ժամում՝ 100 մարդ: Օդանավակայանի շինարարական աշխատանքների 60%-ն իրականացվել են: «Մենք ունենալու ենք միջազգային չափանիշներին համապատասխան օդանավակայան՝ հիմնանորոգված թռիչքուղիով, այն կարող է ավելի ծանր օդանավեր ընդունել: Թռիչքուղու ծածկն ամբողջությամբ փոխվում է: Խորհրդային տարիներին Կապանի օդանավակայանը համարվում էր ԽՍՀՄ-ում վայրէջքներն ու թռիչքներ իրականացնելու համար ամենաբարդ օդանավակայաններից մեկը»,-վստահեցրեց Թադեւոսյանը:
Կարդացեք նաև
Տեղադրվելու են թռիչքատեղեկատվական նոր համակարգեր, որոնք եղանակային ոչ բարենպաստ պայմաններում էլ հնարավորություն են տալու իրականացնել թռիչքներ եւ վայրէջքներ, եւ ինչպես ասաց Թադեւոսյանը, նախատեսվում է 2.3 միլիարդ դրամի ներդրում, որից 800 միլիոնն արդեն իրականացվել է:
19 տեղանոց L-410 օդանավն արդեն Հայաստանում է՝ «Զվարթնոց» օդանավակայանում է, անձնակազմը վերապատրաստվել է Չեխիայում, այս օդանավով նախատեսվում է կատարել Երեւան-Կապան-Երեւան չվերթներ: Թե երբ վերջապես կշահագործվի օդանավակայանը, Թադեւոսյանը ժամկետներ չնշեց:
Նելլի ԲԱԲԱՅԱՆ
