Փաստաբան Լիպարիտ Սիմոնյանը տարակուսած է վարչապետ Նիկոլ Փաշինյանի այն հայտարարությունից, որ դատախազությունը կամ քննչական կոմիտեն գործերը բացահայտում են, բայց ինքը հույս չունի, թե դատարանը գործն ավարտին կհասցնի:
Հիշեցնենք, այդ հայտարարությունը վարչապետն արել էր իր հնչեցրած դատարանների ելքերը եւ մուտքերը փակելու կոչից հետո հրավիրված խորհրդակցությունում:
Ըստ փաստաբանի, դատարանը պետք է ենթարկվի միայն օրենքին, մինչդեռ Հայաստանի վարչապետն այլ կարծիք ունի: «Այսինքն ի՞նչ, եթե նախաքննական մարմինը մի բան է ներկայացրել դա պիտի հաստատվի՞, կամ դատախազությունը ինչ-որ բան է ներկայացրել, դա էլ պիտի հաստատվի՞։ Այսինքն` դատարանը անելիք չունի՞»,- հարցնում է Լիպարիտ Սիմոնյանը։
Փաստաբանի կարծիքով, որեւէ մարմնի կողմից դատարանի նկատմամբ որեւէ ոտնձգություն չպետք է արվի, սակայն այդպիսի բան եղավ մայիսի 20-ին, երբ ՀՀ քաղաքացիները վարչապետ Նիկոլ Փաշինյանի կոչին անսալով՝ արգելափակեցին դատարանների մուտքերը։ «Եթե դա թույլատրվում է գործադիր իշխանությանը, ինչո՞ւ չպետք է թույլատրվի ցանկացած քաղաքացու»,- իր տարակուսանքը հայտնեց մեր զրուցակիցը:
Կարդացեք նաև
Մանրամասները`տեսանյութում
Նելլի ԳՐԻԳՈՐՅԱՆ
