Երեկ գյումրեցի լրագրողներից մեկն՝ Անահիտ Սիմոնյանն իր ֆեյսբուքյան էջում լուսանկար էր տեղադրել՝ հայտնելով, որ «ՊՆ» գրառումով օճառները՝ հատը 100 դրամով, վաճառվում են Գյումրու կենտրոնական շուկայում։ Լուսանկարից ակնհայտ է, որ խոսքը խոշոր խմբաքանակի մասին է։ Լրագրողն անգամ հստակ հասցեն է նշել, թե որտեղ են բացօթյա վաճառում օճառները․ Գյումրու շուկա՝ «Կառոնա» սուպերմարկետից վերև։
«Այսօր Գյումրու շուկայից օճառ պետք է գնեի, սիրտս կասկած ընկավ, չգնեցի: Մեր ժողովրդի մեջ կան մարդիկ, ովքեր չեն ուզում փոխվել: Գետինը մտնեք, ձեզանից պրծնենք: Ձեր նմանների երեսին թքել է պետք: Ձեզ ոչ մի իշխանափոխություն, հեղափոխություն չի հեղափոխի: Այսպիսի մտածելակերպով անձանց միայն գերեզմանը կփրկի: Գյումրու շուկան է, օճառներ են վաճառում, հատն արժե 100 դրամ: Դրանց վրա նշված է Պաշտպանության նախարարություն: Ախր մենք մեծ գումարներ էլ չունենք, որ տրամադրենք բանակին եւ ոմանք այսպես են վարվում», -գրել էր Անահիտ Սիմոնյանը։
Մենք թեմայի շուրջ պարզաբանում խնդրեցինք ՊՆ մամլո քարտուղար Արծրուն Հովհաննիսյանից, որն ասաց․ «Զբաղվում է ռազմական ոստիկանությունը, արդյունքները լինեն, կասենք»։
Նունե ԱՐԵՎՇԱՏՅԱՆ
Կարդացեք նաև
Լուսանկարն՝ Անահիտ Սիմոնյանի ՖԲ էջից
