Ինչպե՞ս Է կիրառվելու վեթինգը կամ զտումը, ֆիլտրումը մեր դատաիրավական համակարգում, այս հարցի պատասխանն են փորձում ստանալ ակտիվ քաղաքացիները:
Քաղաքական մի շարք դատավարություններում ներգրավված փաստաբան Հարություն Բաղդասարյանն առնվազն մեկ տարի ուշացած է համարում կառավարության նախաձեռնությունը, քանի որ այդ ամենը պետք է իրականացվեր հեղափոխության սկզբնական փուլում:
Փաստաբանը նշում է, որ Նիկոլ Փաշինյանը լեգիտիմացրել է հանրության կողմից 2015թ. չընդունված սահմանադրությունը, հետո այդ սահմանադրությամբ գնացել, ոչ օրինական ճանապարհով իշխանության եկած ՀՀԿ-ից ընդունել է վարչապետի պաշտոնը:
«Եթե այդ ամենն աներ հեղափոխական ճանապարհով, ապա ոչ ոք ոչ մի բան չէր ասի, որովհետեւ հեղափոխությունն օրենքով չի կատարվում: Եթե դրա վերաբերյալ օրենք ընդունվի, եւ այդ օրենքով կսահմանվի, թե որ դատավորի հետ որ դեպքում ինչպես պետք է վարվել, այդ ժամանակ էլ կարելի Է խոսել այդ մասին: Բայց չենք պատկերացնում, թե այդ օրենքն ինչ իրավական հիմքերով է ընդունվելու, Սահմանադրությունը տալի՞ս է այդ հնարավորությունը, թե՞ ոչ: Հիմա անդրադառնանք վեթինգին: Ինչո՞ւ պետք է ես ասեմ, թե իմ եկամուտները որտեղից են, եթե ես չունեմ դրա պարտականությունը: Ամենից շատ տուժելու են այն դատավորները, որոնք չեն ընդդիմանա, դիմում կգրեն եւ դուրս կգան համակարգից: Հասարակությունն էլ տեղեկանալու է, որ հենց նրանք են ամենակաշառակեր դատավորները, դրա համար են դիմում գրել ու դուրս եկել»,– նշեց փաստաբանը:
Կարդացեք նաև
Նկատեցինք, որ ժամանակին բազմիցս հենց Մարտի 1-ի գործով, այլ հասարակական հնչեղություն ունեցող գործերով հրապարակվել են բազմաթիվ դատավորների անուններ, որոնց կայացրած վճիռները բողոքարկվել են Մարդու իրավունքների եվրոպական դատարանում, ՄԻԵԴ-ի որոշումներն էլ հաստատել են քաղաքացիների իրավունքների կոպիտ խախտումները:
Հարություն Բաղդասարյանը հակադարձում է՝ ինչո՞ւ նոր իմացանք այդ դատավորների մասին, Մարտի 1-ի գործով Փաշինյանին չէի՞ն դատել:
«Ես չեմ հավատում, որ կարելի է այդ ուղղությամբ աշխատանք կատարել իրավական դաշտում, չեմ հավատում նաեւ, որ դա այն արդյունավետ եղանակն է, որ պետք է իրականացվի: Ես կարծում եմ, որ այս դեպքում թացը չորի հետ կարող է խառնվել, եւ դրա նպատակը ոչ թե դատական անկախ համակարգ ստեղծելն է, այլ այնպիսի դատական համակարգ, որը ենթարկվի ներկա իշխանություններին: Դատավորներն այդ դեպքում կդառնան հպատակ եւ կենթարկվեն գործադիր իշխանությանը»,– ասաց փաստաբանը:
Թագուհի ՀԱԿՈԲՅԱՆ
Հոդվածն ամբողջությամբ կարող եք կարդալ «Հրապարակ» թերթի այսօրվա համարում
