«Երբ հստակ կսահմանվի, թե ինչ է «վեթթինգը», եւ ինչ մեխանիզմներով է այն իրականացվելու, եւ եթե այդ ժամանակ ԱԱԾ-ն կունենա իր անելիքները, ապա, միանշանակ, կիրականացնի դրանք»,-լրագրողների հետ ճեպազրույցում այսօր անդրադառնալով վարչապետ Նիկոլ Փաշինյանի՝ դատավորներին «վեթթինգի» ենթարկելու մասին հայտարարությանը, ասաց ՀՀ ԱԱԾ ղեկավար Արթուր Վանեցյանը:
Հարցին՝ «միայն դատավորնե՞րը պետք է «վեթթինգի» ենթարկվեն», նա պատասխանեց. «Ես անհրաժեշտություն եմ տեսնում առհասարակ, որպեսզի հանրության շրջանում որեւէ պաշտոնյանի անցյալի, օրինականության եւ գործունեության մասին կասկածներ չմնան: Դա կկոչվի «վեթթինգ», թե այլ բան, կարծում եմ՝ հանրության բոլոր կասկածները պետք է փարատվեն: Խոսքը նաեւ պաշտոնյայի նշանակման եւ կապերի մասին է»:
Լրագրողները հետաքրքրվեցին՝ «Դատարանների շրջափակումից հետո որեւէ դատավորի առնչությամբ ԱԱԾ-ում գործընթաց կա՞»: Վանեցյանը պատասխանեց. «Կոռուպցիայի դեմ անզիջում պայքարն առաջին իսկ օրվանից եղել է: «Դոսյե» չկա, ԱԱԾ-ն իրականացնում է օպերատիվ-հետախուզական միջոցառումներ, որոնք համապատասխանում են օրենքին: Այդ անձը դատավոր կլինի, թե նախարար, որեւէ կապ չունի»:
Կարդացեք նաև
Լուիզա ՍՈՒՔԻԱՍՅԱՆ
