Հովիկ Հարությունյանը` Ռոբերտ Քոչարյանի մասին
«Արաբկիր» երկրապահ ջոկատի հրամանատար, նախկին քաղբանտարկյալ Հովիկ Հարությունյանը համամիտ է Նիկոլ Փաշինյանի այն վերլուծության հետ, որ կան ուժեր, որոնք հեռահար նպատակ ունեն`իրենց կոռուպցիոն հանցագործությունները թաքցնելու համար, դավադիր պատերազմ հրահրելու, անգամ որոշ տարածքներ հանձնել եւ տեղի ունեցածի պատասխանատվությունը Հայաստանի կառավարության վրա դնելու: Նա կարծում է, որ ռեւանշի ձգտող ուժերը հասկանում են, որ ժողովրդի ուժով իշխանության եկած Նիկոլ Փաշինյանին իշխանությունից հեռացնելու այլ տարբերակ, քան ժողովուրդն է, չկա եւ փորձեր կանեն խաղալ այդ նուրբ լարերին: Մանավանդ, ըստ նրա, դրա փորձը ունենք: Նկատի ունի 2016-ի ապրիլյան քառօրյա պատերազմը, որի արդյունքում 800 հազար հա տարածք կորցրեց հայկական կողմը. «Եվս մեկ նմանատիպ սադրանք, եւս 800 հազարի կորուստ եւ մնում է մեղադրել ՀՀ նոր իշխանություններին: Միայն այս կերպ կարելի է ժողովրդին հանել այսօրվա լեգիտիմ ղեկավարի դեմ եւ նրան իշխանությունից հեռացնել: Նրանք տեսնում են, որ վարչապետը մեծ քայլերով գնում է առաջ, արդեն եկել է ժամանակը, որ իրենք պետք է պատասխան տան ամեն հանցագործության համար: Ուստի, փորձելու են ամեն ինչ անել, որպեսզի խուսափեն պատասխանատվությունից: Բայց ժողովուրդը քնած չէ, մենք մեր վարչապետի կողքին ենք»: Հովիկ Հարությունյանը ժողովրդին հորդորում է Ռոբերտ Քոչարյանի խափանման միջոցը փոխելու հարցում ցայտնոտի մեջ չընկնել. «Դա ոչինչ չի նշանակում: Այսօր ազատ է, վաղը կլինի իր հավերժական տեղում»:
Ինչ վերաբերվում է 2016 թվականի ապրիլյան քառօրյա պատերազմի հարցով քննիչ հանձնաժողով ստեղծելու հայտարարությանը, մեր զրուցակիցն ասում է`շատ են ուշացրել, բայց էլի ուշ չէ. «Բոլոր մեղավորները պետք է պատասխանատվության ենթարկվեն: Մենք երկիր ենք կառուցելու եւ նրա ամենահզոր ուժը`բանակը, ինչպես ասում էր Վազգեն Սարգսյանը`որդին, հիվանդ է, պետք է առողջացնենք»:
Ն. ԳՐԻԳՈՐՅԱՆ
Կարդացեք նաև
«Առավոտ» օրաթերթ,
23.05.2019
