«Իրականում նման մտահոգություններ մենք ունենք, բայց դրա մասին բաց խոսելը որոշակի սահմանափակումներ ունի»,-այսօր կառավարության նիստից հետո լրագրողների հետ ճեպազրույցում ասաց Ազգային անվտանգության խորհրդի քարտուղար Արմեն Գրիգորյանն, անդրադառնալով՝ վարչապետ Նիկոլ Փաշինյանի այն հայտարարություններին, թե Հայաստանի դեմ դավադրություն է պատրաստվում:
Գրիգորյանն ասաց, որ վարչապետը հնարավորինս սրա մասին խոսել է եւ այն, ինչ հնարավոր է եղել, բաց խոսվել է. «Մնացածի մասին, եթե անհրաժեշտություն լինի, մանրամասն կխոսվի»:
Aravot.am-ի հարցին՝ արդյոք այդ դավադրությունն արտաքին ուժերն են կազմակերպում, թե՞ ներքին, թե՞ երկուսը միասին, Գրիգորյանը պատասխանեց. «Դավադրությունը 21-րդ դարում դավադրության ներքինն ու արտաքինը տարանջատելը մի քիչ դժվար է, որովհետեւ դրանք որոշակի չափով փոխկապակցված են: Կարելի է ե՛ւ ներքին ե՛ւ արտաքին դիտարկել: Նույնիսկ շատ հաճախ ներքին գործընթացներն արտաքին ազդեցություն են ունենում, այդ պատճառով այս մասին մանրամասն խոսելու անհրաժեշտություն չկա այս պահին, ինչ կարողացել ենք, ասել ենք»:
Կարդացեք նաև
Aravot.am-ի այն հարցին էլ՝ վարչապետի հորդորը՝ ԱԺ-ում ապրիլյան պատերազմի բոլոր հանգամանքները քննել, քննիչ հանձնաժողով ստեղծել, արդյոք փոխկապակցված է դավադրության հետ եւ ի՞նչ մտահոգություններ կան, պայմանավորվա՞ծ պատերազմ էր, Գրիգորյանն այսպես պատասխանեց. «Մինչեւ 2016 թվականի ապրիլը Հայաստանում կարծիք կար, որ գոնե անվտանգության հարցում մենք մեծ խնդիրներ չունենք: Ապրիլյան պատերազմը ցույց տվեց, որ մենք ունենք այդպիսի խնդիր, եւ այդ խնդիրները լուրջ են: Եվ հանձնաժողովի հետաքննությունը հնարավորություն կտա բարձրացնել այն բոլոր խնդիրները, որոնք եղել են ապրիլյան պատերազմի ընթացքում, լուծում տալ այդ խնդիրներին եւ այնպես անել, որ հետագայում չհայտնվենք այդ իրավիճակում: Դա պաշտպանողական եւ անվտանգության համակարգերի արդյունավետությունը բարձրացնելու նպատակ ունի, որպեսզի ունենանք առավել լավ անվտանգության համակարգ»:
Մանրամասն՝ տեսանյութում:
Նելլի ԲԱԲԱՅԱՆ
