ԱԺ մարդու իրավունքների պաշտպանության եւ հանրային հարցերի մշտական հանձնաժողովի նիստում այսօր պատգամավորները քննարկում են «Փաստաբանության մասին» ՀՀ օրենքում լրացումներ կատարելու մասին օրենքի նախագիծը, որը ենթադրում է ՀՀ փաստաբանների պալատի Հանրային պաշտպանի գրասենյակի լիազորությունների ընդլայնում: Ըստ նախագծի՝ Փաստաբանների պալատի նախագահը կկարողանա աշխատանքային պայմանագիր կնքել նաեւ Հանրային պաշտպանի գրասենյակի անդամ չհանդիսացող փաստաբանի հետ (անվճարունակ քաղաքացիները հանրային պաշտպանի ծառայություններից օգտվում են անվճար. հանրային պաշտպաններին վարձատրում է պետությունը):
Հանձնաժողով հրավիրված ՀՀ փաստաբանների պալատի նախագահ Արա Զոհրաբյանը մատնանշեց, որ այս փոփոխությամբ նպաստում են փաստաբանի անկախությանը. «Նա զերծ է մնում քննիչի հետ կոնտակտներից, Փաստաբանների պալատն էլ երաշխավորում է նրա ամսական աշխատավարձը»:
Արա Զոհրաբյանի խոսքով՝ վիճակագրությունը փաստում է, որ ամեն տարի քրեական եւ վարչական գործերի թիվն ավելանում է. «Դրանք սարսափելի թվեր են: Քրեական գործերի թիվը շատացել է 100, իսկ վարչական գործերի թիվը՝ մոտ 1000%-ով: Գործերի քանակն ազդում է հանրային պաշտպանի աշխատանքի որակի վրա: Բացի այդ, Հանրային պաշտպանի գրասենյակը որակյալ ծառայություններ է մատուցում, քաղաքացիների դիմելիությունն ավելացել է: Երբ հանրային պաշտպանի որակը բարձրանում է, անվճարունակ քաղաքացին նախընտրում է անվճար իրավաբանական օգնություն ստանալ, քան դիմել վճարովի փաստաբանին»:
Լուիզա ՍՈՒՔԻԱՍՅԱՆ
