«Իմ քայլը» խմբակցության պատգամավորներն այսօր ժամը 12-ից փակ նիստ էին հրավիրել եւ ավելի քան 3 ժամ բուռն քննարկումների մեջ էին:
Նիստից հետո «Իմ քայլը» խմբակցության ղեկավար Լիլիթ Մակունցը լրագրողների հետ զրույցում ասաց, որ որոշում է կայացվել եւ առաջիկա լիագումար նիստի ընթացքում հարց կդրվի ջրօգտագործման հետ կապված քննիչ հանձնաժողով ստեղծելու, 2016-ի ապրիլյան պատերազմի հետ կապված քննիչ հանձնաժողով ստեղծելու վերաբերյալ: Նաեւ vetting-ի մասին նախագիծ ունենալու որոշում է կայացվել: Այսօրվանից սկսած ինտենսիվ այդ ուղղությամբ աշխատելու ենք, նախկինում մեկնարկը տրված էր»:
Թե ինչ գործիքակազմ է կիրառվելու vetting-ի՝ զտման համար՝ Մակունցը չասաց, միայն վստահեցրեց, որ հնարավորինս սեղմ ժամկետում նախագիծը կլինի:
Թե քննիչ հանձնաժողովներում ովքեր են ներգրավվելու, ինչ ձեւաչափով է ստեղծվելու՝ Մակունցը պատասխանեց. «Պաշտպանության եւ անվտանգության հանձնաժողովը կզբաղվի, քննիչ հանձնաժողովը հենց լինելու է այդ հանձնաժողովը, նրանք կտեղեկացնեն, թե ինչպես է լինելու: Եթե անհրաժեշտություն տեսնեն ներգրավելու այլ անձանց, քննիչ հանձնաժողովը կգնա այդ քայլին»:
Կարդացեք նաև
Հարցին՝ այդ հանձնաժողովն ի՞նչ է քննելու ապրիլյան պատերազմի հետ կապված՝ Մակունցը պատասխանեց, որ կոնկրետ քննության թիրախը թե ինչ է լինելու՝ կձեւակերպեն ավելի ուշ. «Անդրանիկ Քոչարյանի գլխավորությամբ կկազմակերպվեն աշխատանքները: Մենք այսօր որոշում ենք կայացրել, որ պետք է սեղմ ժամկետներում ստեղծվի այդ հանձնաժողովը»:
ԵԽԽՎ-ն քիչ առաջ հայտարարություն է տարածել ու Հայաստանին կոչ է արել զերծ մնալ քայլերից, գործողություններից, որոնք կարող են ընկալվել որպես ճնշում դատական համակարգի վրա : Հարցին՝ սա նախազգուշացո՞ւմ էր իշխանություններին՝ Մակունցը պատասխանեց, որ հայտարարության տեքստին ծանոթ չէ, արտգործնախարարությունը եւ ԱԺ արտաքին հարցերի հանձնաժողովը կարձագանքեն:
Հռիփսիմե ՋԵԲԵՋՅԱՆ
