«Եթե քաղաքական ակցիաները թույլատրելի են օրենսդիր եւ գործադիր մարմինների հանդեպ ճնշում գործադրելու պայմաններում, ապա դատարանների հանդեպ ակցիաներն անթույլատրելի են, քանի որ դատական իշխանության ապաքաղաքական պետք է լինի»,-«Հենարան» մամուլի ակումբում լրագրողների հետ հանդիպմանն այսօր անդրադառնալով դատարանները շրջափակելու մասին Նիկոլ Փաշինյանի կոչին՝ ասաց սահմանադրագետ Վարդան Այվազյանը:
«Դատարանների գործունեությանը խոչընդոտելը քրեորեն պատժելի արարք է: Անգամ դատարանների դիմաց են արգելվում ակցիաները, որպեսզի չխաթարվի դատարանների գործունեությունը, մինչդեռ Փաշինյանի կոչը ոտնահարեց սահմանադրության մի շարք նորմեր»,-նշեց Վարդան Այվազյանը:
Հարցին՝ «այդ կոչով Նիկոլ Փաշինյանը նպաստե՞լ է ՀՀ-ում սահմանադրական կարգի տապալմանը», Վարդան Այվազյանը պատասխանեց. «Այդ կոչը ոտնահարում է գործող օրենքների նորմերը եւ հակասում է Սահմանադրությանը, բայց այն չի կարելի որակել որպես սահմանադրական կարգի տապալման փորձ: Սահմանադրական կարգը հիմնականում առնչվում է ժողովրդին պատկանող իշխանությունը զավթելուն, բայց մի քանի ժամանոց ակցիան, չեմ կարծում, որ կարելի է տապալում որակել: Չեմ կարծում, որ այդ ակցիան սահմանադրական կարգի տապալման խնդիր էր առաջացնում»:
Լրագրողները հետաքրքվեցին՝ «եթե նման կոչ աներ, ասենք, ընդդիմադիր գործիչը, նա կմեղադրվե՞ր սահմանադրական կարգի տապալման համար»: Վարդան Այվազյանն ընդգծեց. «Ընդդիմադիր թեւի ներկայացուցիչը կամ պարզապես քաղաքացին չեն կարող այդ առումով սուբյեկտ լինել: Խոսքը պաշտոնյայի մասին է: Իսկ ընդդիմադիր գործիչը պատասխանատվության կենթարկվեր՝ դատարանի գործունեությանը խոչընդոտելու համար, բայց ոչ՝ ՀՀ սահմանադրական կարգի տապալման համար»:
Կարդացեք նաև
https://www.facebook.com/aravot.am/videos/2361574630794716/
Լուիզա ՍՈՒՔԻԱՍՅԱՆ
