Հեղափոխության մեկ տարին բոլորելուց հետո ստիպված ենք արձանագրել՝ հեղափոխությունը շարունակվում է, այսինքն` հայտնվել ենք պերմանենտ հեղափոխության շրջափուլում:
Ինչո՞ւ է Հայաստանում պերմանենտ հեղափոխությունը դառնում նպատակ: Իշխանությունը չի կարողանում ու չի լուծում հեղափոխության առաջադրած հարցերը և հասարակության ընդհանրական ուշադրությունը ջանում է շեղել հիմնական խնդիրներից.
1. Տնտեսական հեղափոխությունը չի ստացվում: Ոչ միայն իրական ձեռքբերումներ չկան, այլև առաջին անհրաժեշտության ապրանքների գնաճ է՝ սկսած հացից մինչև բազմաչարչար բանան:
2. Մեկ տարում բազում հայտարարություններ անելով՝ իշխանությունը չունի կադրային ռեսուրս՝ իրականացնելու իր խոստացած փոփոխությունները:
Կարդացեք նաև
3. Ակնհայտ է դառնում, որ լեգիտիմ լինելը բավարար չէ պետության կառավարման համար, և սպառվում է համաժողովրդական աջակցության ռեսուրսը:
Դատական իշխանության թիրախավորումը ունի կոնկրետ նպատակ՝ ժողովրդի ուշադրությունը շեղել բուն խնդիրներից և ուղղել նոր «թշնամուն»՝ «նախկին կոռումպացված իշխանության մնացուկին, որտեղ անընդհատ դավադրություններ են ուրվագծվում»: Բայց ի՞նչ լուծումներ են առաջարկվում: Համարյա ոչ մի: Ասպարեզում մնում է դատարկ պոպուլիզմը:
Դատարանների շենքերը շրջափակելու փոխարեն մեկ տարի ժամանակ կար ոլորտում օրենսդրական փոփոխություններ անելու, գործող օրենսգրքերը փոխելու՝ ըստ նոր արժեքային համակարգի: Չարվեցին: Համատարած բոլոր դատավորներին անվանել «անվստահելի դատական համակարգ» ու վիրահատական միջամտություն հայտարարել՝ վեթինգի կամ հրաժարականների պահանջով, քաոս է ստեղծելու: Վարչապետը գոնե մեկ չափանիշ չնշեց՝ ինչպե՞ս է որոշվելու՝ դատավորը անաչա՞ռ է, թե՞ աչառու: Լավ, վաղը հրաժարական տվեցին բոլոր 234 դատավորները, ու ի՞նչ է լինելու: ՔՊ անդամները վիճակահանությամբ նշանակվելու՞ են դատավոր, համաժողովրդական հանրաքվեն դատական համակարգի շուրջ ի՞նչ հարց է առաջադրելու՝ վստահություն հայտնել կոնկրետ դատավորների՞ն, թե՞ վարչապետի պոռթկումներին:
Դատարանների շրջափակմանը մասնակցեց 1100 քաղաքացի: Համեմատեք վարչապետի կոչով փողոց դուրս եկողների նախկին թվերի հետ՝ բացահայտորեն ժողովուրդը հոգնել է պերմանենտ հեղափոխությունից և ուզում է ապրել արժանապատիվ կյանքով, որ իրեն խոստացվել է մեկ տարի առաջ: Իսկ պատկերացնու՞մ եք՝ ինչ կլինի, եթե մի օր Նիկոլ Փաշինյանը որոշի պայքարել առողջապահության համակարգում «անցյալի մնացուկների» դեմ ու հիվանդանոցները շրջափակելու և բժիշկներին ներս չթողնելու կոչ անի: Աղոթեք Աստծուն, որ այդ օրը վիրահատության կարիք չունենաք:
Անահիտ ԱԴԱՄՅԱՆ
Հոդվածն ամբողջությամբ՝ «Իրատես» թերթի այսօրվա համարում
