Ախալքալակի շրջանում հարձակում են գործել պահակի վրա և գողացել 32 գլուխ խոշոր եղջերավոր կենդանի: Սահմանապահները կարողացել են վերադարձնել կենդանիներին, նախքան դրանց կհասցնեին անցկացնել Թուրքիայի սահմանը, սակայն գողերին հաջողվել է թաքնվել:
Հարձակումը տեղի է ունեցել Թուրքիայի հետ սահմանամերձ Կարցախի գյուղում: Գոմի աշխատակից Սարգիս Գասպարյանի խոսքով՝ ինքը որդու հետ հեռախոսով խոսելիս է եղել, հետո աղմուկ է լսել և շների հաչոց, բացել է տնակի դուռը, որտեղ գիշերում էր: Տարօրինակ բան զգալով՝ նա վերադարձել է և դուռը փակել: Թալանչիները սպանել են շանը, հետո կոտրել տնակի դուռը և ներս մտել:
«Ներս մտան և սկսեցին պահանջել հեռախոսս: Ես վրացերենով ասացի, որ չեմ տա, իսկ նա թուրքերեն ասաց՝ ոնց չես տա, և հարվածեց ինքնաձիգի կոթով: Ես հասցրի գցել հեռախոսը: Հետո ինչ-որ բան ցանեցին աչքերիս մեջ, ներս մտավ երկրորդը և սկսեց կապել ձեռքերս: Կապեցին պարանով և ձեռնաշղթաներ հագցրին, փակեցին բերանս և գնացին: Նրանք ռազմական հագուստով էին: Ես համոզված եմ, որ նրանք գիտեին վրացերեն, թուրքերեն ակցենտով էին խոսքով: Ես մի քիչ հասկանում եմ թուրքերեն»,- ասել է Սարգիս Գասպարյանը:
Երբ կողոպտիչները գնացել են, Սարգիսը դժվարությամբ քանդել է պարանը, բայց ձեռնաշղթաները չի կարողացել հանել: Նա բացել է դուռը և գնացել գոմի սեփականատիրոջ տուն: Իր խոսքով՝ այնքան է գլխով հարվածել պատուհանին, մինչև մարդիկ զարթնել են:
Կարդացեք նաև
Կենդանիների տերը՝ Ատոմ Օգմրցյանը, անմիջապես ոստիկանություն է զանգահարել, հետո գնացել սահմանային պահակակետ:
«Պահակակետում ինձ ասացին, որ երբ ես զանգահարեցի… իրենք արդեն տեսել էին, որ կենդանիներ են տեղափոխում: Ասում են, որ չորս հոգի են եղել: Եղել է փոխհրաձգություն, և կողոպտիչներին չի հաջողվել անցկացնել կենդանիներին, բայց իրենք փախել են, և սահմանապահները չեն կարողացել նրանց բռնել»,- պատմել է Ատոմ Օգմրցյանը:
Ատոմ Օգմրցյանը և համագյուղացիները վրդովված են: Սա կենդանիների գողության առաջին դեպքը չէ սահմանամերձ գյուղերում, հենց նրա մոտից նմանատիպ երեք դեպք է եղել:
«Ինչպես կարող է պատահել, որ սահմանապահները չտեսնեն սահմանն անցնող կենդանիներին: Նրանք կարող են անգամ մարդկանց գողանալ և տանել, իսկ սահմանապահները չտեսնեն… Ինչի՞ համար են նրանք, եթե չեն կարող մեզ պաշտպանել»,-վրդովվել է Օգմրցյանը:
Վրաստանի ՆԳՆ-ում քննություն է սկսվել Քրեական օրենսգրքի 179 հոդվածով:
https://www.facebook.com/100009151673326/videos/2224887131159654/
Պատրաստեց՝ Վիկտորյա ԱՆԴՐԵԱՍՅԱՆԸ
