Հանգստյան օրերին մայրաքաղաքում անցկացվեց 2019-ում ավտոսպորտի մրցաշրջանի առաջին մրցումը:
STR ակումբի ղեկավար Արսեն Մանուկյանը Aravot.am-ին տեղեկացրեց, որ իրենք Հայաստանում գործում են արդեն 15 տարի եւ զարգացնում են ավտոսպորտը: «Սա այս տարվա անդրանիկ միջոցառումն է, որին մասնակցում են նաեւ Վրաստանի մեր գործընկերները: Այն պիտի միջազգային կարգավիճակ ունենար, որովհետեւ պետք է գային նաեւ Իրաքից, սակայն ինչ-ինչ պատճառներով կամ ուշանում են, կամ էլ դեռ կգան: Այնպես որ, այս անգամ ստացվեց Հայաստան-Վրաստան հանդիպում: Այսօր մեկնարկելու է շուրջ 50 մասնակից, որոնցից մոտ 15-ը վրացիներն են: Մասնակիցները հաղթահարելու են 402 մետր երկարություն ունեցող մրցուղին: Մրցատարածությունն այդքան է, քանի որ անցած դարի 30-ական թվականներին ԱՄՆ-ում, երբ վարորդները փողոցներում սկսեցին մրցել խաչմերուկից խաչմերուկ, տարածությունը կազմել էր հենց 402 մետր: Ավտոմոբիլային միջազգային ֆեդերացիան այն ընդունել է որպես մարզաձեւ եւ պահպանել այդ մրցատարածությունը:
Այսօր մասնակիցները մրցելու են ավտոմոբիլների շարժիչների ծավալի վեց դասակարգումով: Տարվա ընթացքում անցկացնելու ենք նաեւ այլ մրցումներ, որոնց արդյունքով արդեն քանի տարի ձեւավորում ենք Հայաստանի հավաքական թիմեր, որոնք հնարավորության դեպքում հանդես կգան հարեւան այլ երկրներում կազմակերպվելիք մրցումներում», – ասաց Արմեն Մանուկյանը:
Մրցման ավարտին հայտնի դարձավ, որ բոլոր վեց դասային վարժություններում հաղթել են Հայաստանի ավտոմարզիկները:
Կարդացեք նաև
Աշոտ ՀԱԿՈԲՅԱՆ
