ՀՀ երկրորդ նախագահ Ռոբերտ Քոչարյանի՝ խափանման միջոցը փոխելու Երեւանի ընդհանուր իրավասության դատարանի որոշումը բողոքարկելու վերջնական որոշում մեղադրող կողմը կկայացնի դատական ակտին ծանոթանալուց հետո: Այդ մասին նիստի ավարտից հետո լրագրողների հետ զրույցում ասացին դատախազները:
Մեղադրող կողմը մնում է իր կարծիքին`Ռոբերտ Քոչարյանի նկատմամբ ընտրված խափանման միջոցը` կալանքը, ճիշտ էր: Դատախազների համոզմամբ՝ կալանքի միջոցը միակն էր, որ կարող էր զսպել երկրորդ նախագահի վարքագիծը: Ռոբերտ Քոչարյանի կողմից «պատշաճ վարքագիծ դրսեւորելը» մեղադրող կողմը շարունակում է համարել վարկած, որը փաստարկված չէ:
Դատարանի որոշման հիմնավորվածության մասով էլ մեղադրող կողմը կարծիք կհայտնի, երբ ստանան դատարանի որոշումը:
Երեկ Գլխավոր դատախազությունը հաղորդագրություն էր տարածել Ռոբերտ Քոչարյանի պաշտպանների գործելաոճի վերաբերյալ: Գլխավոր դատախազությունը պաշտպաններին մեղադրում է մանիպուլյացիաների եւ հանրային տրամադրությունների վրա խաղալու մեջ:
Կարդացեք նաև
Մեղադրող դատախազները լրագրողներին ասացին, որ այս փուլում դատախազության հաղորդագրությանն ավելացնելու ոչինչ չունեն:
Դատախազները հորդորեցին շեշտադրում չանել Արցախի նախագահների կողմից երաշխավորություն ներկայացնելու փաստին եւ հավելեցին, որ իրենք հարցն իրավական տիրույթում են դիտարկում:
Նելլի ԳՐԻԳՈՐՅԱՆ
