«Կանանց ռեսուրսային կենտրոն» հ/կ ղեկավար Լարա Ահարոնյանը facebook-ի իր էջի արգելափակման պատասխանատվությունը վերցրած «Digital Granate» նախաձեռնությանը ֆեյք է համարում:
«Չեմ ճանաչում, իրենք ֆեյք են, ու եթե նույնիսկ վստահ են, որ մենք սխալ բան ենք անում, ուրեմն թող բաց դեմքով եւ օրինական ճանապարհով գնան մեր հանդեպ հայց ներկայացնեն, ոստիկանություն դիմեն: Իրենք ֆեյք էջերով ուղղակի իրենց անձնական արժեքների հիման վրա ուզում են փակեն մեր էջերը, ինձ համար իրենց արածը անօրինական խուլիգանություն է օնլայն հարթակում»,- կարծում է Լարա Ահարոնյանը:
Ըստ նրա՝ իր, քաղաքական վերլուծաբան Ստյոպա Սաֆարյանի, «Իրազեկ քաղաքացիների միավորում» հ/կ համակարգող Դանիել Իոաննիսյանի եւ Գյումրու «Ասպարեզ» ժուռնալիստների ակումբի ղեկավար Լեւոն Բարսեղյանի էջերը արգելափակողները մի նպատակ ունեն՝ շատացնեն կառավարության դեմ խոսողների թիվը. «Փորձում են կապել հիմիկվա կառավարության հետ, փորձում են մանիպուլյացիաներ անել, նոր կառավարության դեմ խոսողները շատանան ու շատ դեպքերում օգտագործում են իրավապաշտպաններին, ու չեմ կարծում, որ սա մի խումբ է կամ մի տրամադրություն, ինձ թվում մարդիկ են, որոնց համար խորթ է մարդու իրավունքների հասկացողությունը եւ ոչ բռնի արժեհամակարգը»:
Դանիել Իոաննիսյանին էլ իրենց էջերի արգելափակումը ստանձնած նախաձեռնության հայտարարությունը կասկածների տեղիք է տվել. «Մի քիչ տարօրինակ է, որովհետեւ այդ էջերից վերջինը՝ Լարայինը, արգելափակվել էր 3-4 օր առաջ, ու տարօրինակ է, որ այդ նախաձեռնությունից միայն երեկ են հայտարարում էջի արգելափակման մասին, թերեւս ես հիշում եմ՝ քանի կազմակերպություն իր վրա վերցրեց սեպտեմբերի 21-ի ահաբեկչությունը… իրականում ինձ թվում է՝ ոմանք փորձում են իրենց վրա վերցնել մի բան, որ իրենք չեն արել ու դրանից օգտվելով որոշ շրջանակների մոտ իրենց PR-ն անել: Հակառակ դեպքում, եթե իրենց վրա պետք է վերցնեին, թող էջի արգելափակման առաջին օրը վերցնեին»:
Կարդացեք նաև
Նա նաեւ ասաց՝ սկսել են ուսումնասիրել այդ նախաձեռնության գործունեությունը, հասկանալ՝ արդյոք նրանց արարքի մեջ կա հանցակազմ, աշխատանքներ են տարվում նաեւ, որ այլ հանրային գործիչներ նույն խնդրին չբախվեն:
Մեր հարցին, թե ում ականջներն է տեսնում նախաձեռնության հետեւում, պատասխանեց՝ պետք է նախ հասկանալ, թե ինչն է միավորում Ստյոպա Սաֆարյանին, Լարա Ահարոնյանին, իրեն ու Լեւոն Բարսեղյանին: Մեր դիտարկմանը, թե գուցե Սորոսը, նա պատասխանեց, որ նույնիսկ Սորոսը չի միավորում, որովհետեւ Ստյոպա Սաֆարյանը երբեք Սորոսի հիմնադրամից փողեր չի ստացել:
Արփինե ՍԻՄՈՆՅԱՆ
