Գյումրիի տեղեկատվական տեխնոլոգիաների կենտրոնում այսօր տեղի ունեցավ ԵՊՀ 100-րդ տարեդարձին նվիրված միջոցառումները համակարգող հոբելյանական հանձնաժողովի նիստը:
Ինչպես արդեն տեղեկացրել ենք, այսօր ԵՊՀ-ն նշում է իր հիմնադրման 100-ամյակը: Տոնական օրվա կապակցությամբ Գյումրիում և Երևանում կազմակերպվել են մի շարք միջոցառումներ, որոնցից մեկը ԵՊՀ հոբելյանական հանձնաժողովի նիստն էր՝ ԵՊՀ ռեկտոր Արամ Սիմոնյանի գլխավորությամբ:
Նիստի սկզբում ԵՊՀ ռեկտորը շնորհավորեց ներկաներին և տեղեկացրեց, որ հարյուր տարի առաջ՝ այս օրը, Հայաստանի Հանրապետության նախարարների խորհուրդը Երևանում համալսարան հիմնելու վերաբերյալ որոշում է ընդունել:
Արամ Սիմոնյանը փաստեց, որ հոբելյանական տարին հեշտ չի անցկացվում: Նրա խոսքով, հարյուրամյա հոբելյանը պետականորեն տոնելու մասին չի քննարկվում. «Մի կողմից՝ մենք տխրում ենք, մյուս կողմից՝ հասկանում ենք, թե ինչով է այն պայմանավորված: Անկախ ամեն ինչից՝ արդեն երեք տարի է, ինչ կազմվել է 100-ամյակի միջոցառումները համակարգող հոբելյանական հանձնաժողովը»:
Կարդացեք նաև
ԵՊՀ ռեկտորը տեղեկացրեց, որ հանձնաժողովը բաղկացած է 47 անդամներից, սակայն նիստին մասնակցում են ոչ բոլորը, քանի որ այս շրջանում անցկացվում են ավարտական աշխատանքների պաշտպանություններ. «Բացի դրանից՝ այսօր ԵՊՀ-ում մեկնարկել է «Erasmus +» ծրագրի շրջանակում կազմակերպված մեծ գիտաժողովը, որի աշխատանքներին ներգրավված են մեր հանձնաժողովի անդամներից շատերը: Այն կարևոր գիտաժողով է՝ նվիրված կրթության նորարարական մեթոդների կիրառմանը: Ծրագրի համակարգողը հենց ԵՊՀ-ն է»:
Նիստի ընթացքում Արամ Սիմոնյանը ներկայացրեց ԵՊՀ 100-րդ հոբելյանական տարեդարձի առթիվ ԵՊՀ-ի կողմից կազմակերպվող միջոցառումների ծրագիր- ժամանակացույցը:
Նրա հավաստմամբ, ԵՊՀ 100-ամյակի նվիրված միջոցառումների շրջանակում արդեն կազմակերպվել և դեռ կազմակերպվելու են միջազգային, հանրապետական և ֆակուլտետային գիտաժողովներ, դասախոսություններ, սեմինարներ, հանդիպում-քննարկումներ:
«Ծրագրված են բազմաթիվ հրատարակություններ, որոնցից շատերն արդեն լույս են տեսել: Մասնավորապես լույս է տեսել «Երևանի պետական համալսարանի պատմությունից» գիրք-ալբոմը, որը շուտով կտարածվի նաև ֆակուլտետներում: Հրատարակվել են նաև մի շարք գրքեր, որոնց մեծ մասի շնորհանդեսներն արդեն տեղի են ունեցել: Բացի դրանից՝ տպագրվել են մի շարք այլ աշխատություններ, գրքույկներ: Առաջիկայում նույնպես կհրատարակվեն նոր աշխատանքներ»,- նշեց Արամ Սիմոնյանը:
ԵՊՀ ռեկտորի փոխանցմամբ, իրականացվում են տպագիր և համացանցային լուսաբանումների, գովազդային աշխատանքներ. «Հեռուստատեսային լուսաբանումների աշխատանքների շրջանակում ԵՊՀ հասարակայնության հետ կապերի և լրատվության վարչության կողմից նկարահանվում է ԵՊՀ 100-ամյակին նվիրված ֆիլմ, որը կլինի երկու տարբերակով»:
ԵՊՀ 100-ամյակին նվիրված միջոցառումների շրջանակում Արամ Սիմոնյանի հավաստմամբ, ծրագրված են ցուցահանդեսներ, որոնք ինչպես ԵՊՀ ուսանողների և դասախոսների մտքերի արգասիքն են, այնպես էլ համալսարանի վերաբերյալ պատմական փաստաթղթերի, արտերկրից համալսարան այցելած հյուրերի, նաև ՀՀ տարբեր կազմակերպությունների և անհատների նվիրած հուշանվերների ցուցադրություններ. «Կազմակերպվելու է նաև 100 տարում ԵՊՀ հրատարակչության կողմից հրատարակված գրքերի ցուցահանդես»:
«Կազմակերպվել և կազմակերպվելու են ուսանողական ինտելեկտուալ, մշակութային և մարզական մի շարք միջոցառումներ, հանրային ներգրավման, բարեգործական միջոցառումներ, ինչպես նաև ԵՊՀ-ի խորհրդանշմանը նվիրված տարբեր ձևաչափերի միջոցառումներ, որոնք տեղի կունենան ինչպես Երևանում, այնպես էլ ՀՀ մարզերում և Արցախում»,- ասաց Արամ Սիմոնյանը:
Անդրադառնալով սեպտեմբերին նախատեսված տոնակատարությունների ծրագրի ժամանակացույցին՝ ԵՊՀ ռեկտորը նշեց, որ արտասահմանյան հյուրերի ժամանումը նախատեսված է սեպտեմբերի 24-25-ը. « Պաշտոնական միջոցառումները կմեկնարկեն սեպտեմբերի 26-ին: Այդ օրը նախատեսվում է ԵՊՀ գիտական խորհրդի հանդիսավոր նիստը, որի ժամանակ կընդունվի ակադեմիական ազատության մասին հռչակագիրը, ապա տեղի կունենան պարգևատրումներ»:
Սեպտեմբերի 27-ին անցկացվելու են «Բարձրագույն կրթությունը, հետազոտությունը և նորարարությունը 21-րդ դարում» խորագրով միջազգային խորհրդաժողով, ապա պաշտոնական հանդիսավոր արարողություն Օպերայի և բալետի ազգային ակադեմիական թատրոնում: Ծրագրի շրջանակում նախատեսված են նաև մշակութային միջոցառումներ և ճանաչողական այցեր:
ԵՊՀ ռեկտորը տեղեկացրեց, որ Երևանի քաղաքապետարանին ներկայացվել է դիմում՝ նշանավոր համալսարանականների անունով փողոցներ անվանակոչելու վերաբերյալ: Նրա հավաստմամբ, այս ընթացքում կատարվել և կատարվում են շինարարական աշխատանքներ, ընթացքի մեջ են բարեկարգման ծրագրերը:
Նիստի ընթացքում հանձնաժողովի անդամները քննարկեցին ներկայացված ծրագիրը և հանդես եկան առաջարկություններով:
ԵՊՀ
