«Քաղաքացիական պայմանագիր» կուսակցությունում դրա կազմի մասին կան տարբեր տեսակետներ, օրինակ՝ որ պետք է հնարավորինս ներառական պահել կազմը, պետք է թույլ տալ հնարավորինս շատ մարդ ներգրավվի կուսակցական աշխատանքներում: Այսօր այս մասին լրագրողների հետ ճեպազրույցում ասաց փոխվարչապետ Տիգրան Ավինյանը: Նա նշեց, որ կա նաեւ տեսակետ, որ պետք է կուսակցությունն, այսպես ասած՝ փոքր եւ ոչ շատ մեծ թվակազմով լինի, այս պահին դրանց շուրջ քննարկումներ են ընթանում:
Հարցին՝ արդյոք նախկին հանրապետակաները դիմում են ՔՊ-ին անդամագրվելու համար, փոխվարչապետը պատասխանեց. «Կդժվարանամ ասել»:
Արդյոք կա վտանգ, որ կուսակիցները կարող են լքել ՔՊ-ն, ինչպես ՀՀԿ-ի դեպքում եղավ, եւ հենց այդ պատճառով են ուզում ՔՊ-ն ավելի փոքր կազմով լինի, այս հարցին Ավինյանը պատասխանեց. «Ուղղակի արդյունավետության հարցն է՝ արդյոք մեծ կուսակցությունը կարող է արդյունավետ գործել»:
Կարդացեք նաև
Ավինյանն անդրադարձավ նաեւ ՔՊ-ի առաջիկայում տեղի ունենալիք համագումարին եւ վարչության կազմի ընտրությանը: Այդ կազմը ձեւավորվելու է երկու տարի ժամկետով, թեժ մրցակցություն է սպասվում՝ կուսակցության 65 անդամ է ինքն առաջադրվել, 33 կուսակցական ցանկություն է հայտնել վերահսկող մարմնի անդամ դառնալ:
Այս առնչությամբ Ավինյանն ասաց՝ նոր բան չեն անում, որոշ տեխնիկական հարցեր գուցե փոփոխվեն, կուսակցությունը գործում է այնպես, ինչպես նախկինում էր. «Ղեկավար մարմինը ընտրվում է փակ, գաղտնի քվեարկությամբ»:
Նելլի ԲԱԲԱՅԱՆ
