Այսօր Երեւանի ընդհանուր իրավասության դատարանի Նոր Նորք եւ Ավանի նստավայրում շարունակվում է «Մարտի 1»-ի գործով կալանավորված ՀՀ երկրորդ նախագահ Ռոբերտ Քոչարյանի խափանման միջոցը փոխելու հարցով դատավարությունը: Այսօր սպասվում է Արցախի ներկա եւ նախկին նախագահներ Բակո Սահակյանի եւ Արկադի Ղուկասյանի այցը դատարան: Նրանք անձնական երաշխավորություն էին ներկայացրել դատարանին, իսկ ավելի վաղ նրանք դիմել էին ՀՀ դատախազին`Ռոբերտ Քոչարյանի խափանման միջոցը փոխելու հարցով: Վերջինս պատասխանել էր, որ հարցը դատախազության տիրույթում չէ, քանի որ գործ ուղարկվել է դատարան:
Ռոբերտ Քոչարյանի պաշտպան Հայկ Ալումյանը լրագրողներին տեղեկացրեց, որ Բակո Սահակյանը և Արկադի Ղուկասյանը դատարան կգան օրվա երկրորդ կեսին:
Դատարանի շենքի մոտ այսօր ևս հավաքված են ի պաշտպանություն եւ ընդդեմ երկրորդ նախագահի հանդես եկողներ: Ոստիկանները կողմերին նախ առանձին-առանձին հորդորեցին`այսօր յուրահատուկ օր է`նախագահների դատարան այցի հետ կապված, առավելագույնս զուսպ լինել իրենց պահվածքում եւ հայտարարություններում:
Կարդացեք նաև
Ի պաշտպանություն Ռոբերտ Քոչարյանի հանդես եկողներից Նարեկ Մանթաշյանը ոստիկաններին հորդորեց`եթե մյուս կողմից վիրավորանքներ հնչեն, ոստիկաններն արագ միջամտեն եւ կանխեն: Մյուս կողմի ներկայացուցիչներն էլ ասացին, որ իրենք ավելորդ ոչինչ չեն անելու եւ իրենց նպատակն արդարադատությունն է, ոչ թե ընդդեմ ինչ-որ մեկի հանդես գալը:
Ավելի ուշ ոստիկանների հետ զրույցում, երկու կողմերի ներկայացուցիչներն էլ խոստացան կոռեկտություն պահպանել:
Մի մարդ էլ եկել էր դատարան`դիմում հանձնելու եւ իր ասելով, կարգադրիչները թույլ չէին տալիս, որ ներս մտնի: Իսկ ավելի ուշ նա սկսեց բղավել, որ Ռոբերտ Քոչարյանը բռնաբարել է իր հաշմանդամ աղջկան, իրենց ընտանիքի հաշվին էլ գումարներ է աշխատում: Ոստիկանները նրան առավելագույնս հեռացրին դատարանի շենքի մոտից: Քիչ ժամանակ անց այդ մարդն արդեն դատարանի շենքի տարածքում չէր:
Նելլի ԳՐԻԳՈՐՅԱՆ
