Ախալցխայի գեղեցկուհին՝ Ռաբաթը «Առավոտի» տեսախցիկում
«Հա՞յ եք»,-հարցրին Ախալցխայի կայարանամերձ հրապարակում, երբ նկատեցին, որ բջջային հեռախոսի քարտեզով ինչ-որ հասցե ենք փնտրում: Ախալցխացի մեր հայրենակիցները հարցը տվել էին օգնելու պատրաստակամությամբ, ապա տեղեկանալով՝ ուր ենք ուզում գնալ՝ ուղեկցեցին մինչեւ մեր փնտրած հասցեն: Ճանապարհին հարցուփորձը Հայաստանի, Երեւանի մասին էր, ձեռքի հետ էլ Ախալցխայում եղած տեսարժան վայրերի վերաբերյալ տեղեկություն տվեցին, խորհուրդ տալով անպայման այցելել քաղաքի հայկական եկեղեցիները, որոնցից մեկը, սակայն գործող չէր: Ախալցխայի, այսպես ասած, զարդը սակայն Ռաբաթ ամրոցն է: Զբոսաշրջիկները Ախալցխա հիմնականում այս ամրոցի համար են այցելում: Ախալցխայի գեղեցկուհին՝ Ռաբաթը տեսանելի է քաղաքի ցանկացած անկյունից: Այն կանգնած է Փոցխովի գետի ափին գտնվող բլրի վրա: Ռաբատի անվանումը արաբական ծագում ունի եւ նշանակում է՝ ամրացված վայր:
Ամրոցը կառուցվել է 13-րդ դարում: Ռազմական այս շինությունն, ըստ պատմաբանների, մի քանի անգամ փլուզվել է, շրջափակման մեջ է եղել եւ կրում է տարբեր մշակույթների եւ կրոնների հետքերը:
Կարդացեք նաև
Պատմությունից տեղեկանում ենք, որ այն 1628 թվականին դարձել է Ախալցխայի փաշայության կենտրոնը: Բերդում տեղակայվել են բոլոր արքունական շինությունները, փաշայի տունը եւ գլխավոր ախալցխայական մզկիթը, որին կից գործում էր մուսուլմանական արեւելքի ամենահարուստ գրադարաններից մեկը: Նշենք նաեւ, որ բերդում ապրելու իրավունք են ունեցել միայն մուսուլմանները:
2012թ.-ին Ռաբաթն ամբողջովին վերակառուցվել է՝ դառնալով ե՛ւ պատմական հուշարձան ե՛ւ մշակութային կենտրոն: Այդ նպատակով Վրաստանի կառավարությունը պետական բյուջեից տրամադրել է 34 միլիոն լարի։ Ընդհանրապես, Ռաբաթ ամրոցը համարում են հանդուրժողականության խորհրդանիշ: Ամրոցի եւ նրա շուրջը ծավալվող յոթ հեկտար հրապարակի վրա կառուցվել են ուղղափառ, առաքելական եւ կաթոլիկ եկեղեցիներ: 18-րդ դարում կառուցվել է նաեւ մզկիթ:
Հավանաբար, հենց այդ հանդուրժողականության մթնոլորտն է դեր խաղացել, որպեսզի այստեղ կազմակերպված ջազի փառատոնին մասնակցեն ԱՄՆ-ի, Իրանի, Ադրբեջանի, Թուրքիայի եւ Հայաստանի ջազային երաժիշտները, որոնք Ռաբաթ ամրոցում Կովկասի ջազի փառատոնի գալա համերգն են անցկացրել:
Ամրոցը նաեւ ունի Պատմության թանգարան, խանութներ, հյուրանոցներ եւ այլն: Վերակառուցումից հետո էլ ամրոցում ամեն ինչ անցյալից է, բայց նորացված տեսքով:
Չնայած տեղացիների այն դժգոհություններին, թե զբոսաշրջային սեզոնը նոր է բացվում եւ Ախալցխայի հյուրանոցները դեռեւս կիսադատարկ են, մեր այցելության պահին Ռաբաթում զբոսաշրջիկների մեծ հոսք կար. հանդիպեցինք ազգությամբ ֆիլիպինների, ռուսների, սլովենների, ուկրաինացիների. լեհերի եւ այլ ազգերի ներկայացուցիչների:
Բերդի բացման արարողությանը ներկա է եղել արմատներով ախալցխացի աշխարհահռչակ շանսոնիե Շառլ Ազնավուրը՝ իր լավագույն երգացանկով:
Ամրոցի մուտքը վճարով է միայն զբոսաշրջիկների համար. մեկ անձի համար տոմսն արժե 6 լարի՝ մոտ 1050 դրամ, տեղացիներն այն անվճար են վայելում:
Լուսինե ԲՈՒԴԱՂՅԱՆ
Լուսանկարները՝ Լուիզա Սուքիասյանի
