Հայաստանի ըմբշամարտի ֆեդերացիայի նախաձեռնությամբ այսօր Օլիմպավանում ԶԼՄ-ների հետ կայացած հանդիպման օրակարգի երկրորդ հարցը Ռիոյի օլիմպիական խաղերի արծաթե մեդալակիր Միհրան Հարությունյանի՝ վերջին շրջանում արած հայտարարություններն էին, որոնցում նա անհարգալից արտահայտություններ է արել ինչպես հավաքականի գլխավոր մարզիչ Լեւոն Ջուլֆալակյանի, այնպես էլ հունահռոմեական ըմբշամարտի հավաքականի հասցեին:
Ֆեդերացիայի նախագահ Ռոբերտ Խաչատրյանը նշեց, որ Հայաստանի հավաքականներում միշտ էլ կան բարձրակարգ մարզիկներ, որոնք առանձնանում են համեստությամբ: «Խնդրում եւ պահանջում եմ մեր բոլոր մարզիկներից, որ երբեւիցե իրենց չափի զգացողությունը չկորցնեն: Իսկ լրագրողներին խնդրում եւ հորդորում եմ՝ ըմբշամարտում եւ ընդհանրապես սպորտում, ինտրիգներ մի փնտրեք: Դա լավ բանի չի բերում», – ասաց ֆեդերացիայի նախագահը:
Ֆեդերացիայի գլխավոր քարտուղար Արայիկ Բաղդադյանը հավելեց. «Լրագրողներին խնդրում ենք՝ ոչ մի մարզիկի առանձին մի զանգեք, հարցազրույց մի վերցրեք: Համարեք, որ դա արգելվում է: Կլինեն բաց մարզումներ, հավաքականների մարզիչները ֆեդերացիայի կայքով, տեղեկատվության բաժնով ձեզ կիրազեկեն բաց մարզումների օրը, տեղը, ժամը, եւ դուք ինչ հարց ունեք, կարող եք այդ ժամանակ տալ: Մենք կողմ ենք առողջ քննադատությանը, եթե ֆեդերացիան, մարզիչներն ինչ-որ հարցում թերացել են, ասեք: Բայց ինտրիգներ մի սարքեք, հավաքականում ավելորդ լարվածություն մի մտցրեք: Եվրոպական խաղերում, օլիմպիական խաղերում Միհրան Հարությունյանի արծաթե մեդալներով բոլորս էլ հպարտացել ենք: Բայց ունենք իրենից տարիքով, փորձառու ու տիտղոսակիր Արսեն Ջուլֆալակյան, Արթուր Ալեքսանյան, ունենք հավաքականի գլխավոր մարզիչ Լեւոն Ջուլֆալակյան: Մարզիչներից շատերը կերազեն պարոն Ջուլֆալակյանի արդյունքների կեսին հասած լինել: Սակայն ստացվում է՝ կա ըմբիշ, որը կարող է հայտարարել, թե իր ուզելով է, թե որտեղ կմարզվի: Ինչպե՞ս կարող է այդպիսի բան պատահել: Եթե ըմբիշը հավաքների չի գնում, մրցաշարերի չի մասնակցում՝ ով ուզում է լինի, հավաքականում տեղ չունի: Ոչ ոք արտոնված չէ՝ անկախ տիտղոսներից: Մարզիկները պետք է մասնակցեն Հայաստանի առաջնությանը, ուսումնամարզական հավաքներին, պետք է մարզիչների որոշումներով մասնակցեն միջազգային մրցումների եւ ովքեր կլինեն լավագույն մարզավիճակում, նրանք էլ կընդգրկվեն հավաքական»:
Ռոբերտ Խաչատրյանը անդրադարձավ նաեւ Միհրան Հարությունյանի արած այն հայտարարությանը, թե Լեւոն Ջուլֆալակյանը չի որոշելու իր՝ հավաքական ընդգրկվելու եւ օլիմպիական խաղեր մեկնելու խնդիրը, քանի որ ինքը զրուցել է ՀԱՕԿ նախագահ Գագիկ Ծառուկյանի հետ: «Ես զրույց եմ ունեցել պարոն Գագիկ Ծառուկյանի հետ: Նա երբեւէ իրեն թույլ չի տվել խառնվել հավաքականների կազմի ընտրությանը: Այդ ամենը նա միշտ թողել է հավաքականների մարզիչներին: Ես դա ասում եմ վստահաբար: Իսկ եթե մարդիկ ուզում են նրա անվան հետ կապված ինչ-որ բաներ անել՝ իբր զրուցել են, նման բան գոյություն չունի»,-ասաց Ռոբերտ Խաչատրյանը:
Կարդացեք նաև
Աշոտ ՀԱԿՈԲՅԱՆ
