2008թ.-ի փետրվարի 28-ին ՀՀ Ազգային անվտանգության ծառայությունը նամակ է ուղարկել ոստիկանությանը, որը եղել է հիմք՝ Ազատության հրապարակում ցուցարարների դեմ իրականացված ոստիկանների գործողությունների համար։ Այս մասին այսօր դատարանում Մարտի մեկի գործով նախնական դատական նիստում հայտարարեց ՀՀ սահմանադրական կարգի տապալման համար մեղադրվող ՀՀ երկրորդ նախագահ Ռոբերտ Քոչարյանը: «Մեզ չեն ներկայացվել ԱԱԾ-ի ունեցած՝ փետրվարի 24-ից մարտի 2-ն ընկած ժամանակահատվածին վերաբերող նյութեր՝ մոտ 300 էջ»,-հայտնեց Ռոբերտ Քոչարյանը:
Ըստ Ռոբերտ Քոչարյանի՝ ինքը եւ իր պաշտպանները քրեական գործի նյութերն ուսումնասիրելիս են հայտնաբերել, որ այդ նամակը դատախազներն այս ընթացքում թաքցրել են դատավորներից, որոնք քննել են կալանքների վերաբերյալ միջնորդությունները: Հավանաբար, Ռոբերտ Քոչարյանը նկատի ունի իր կալանքի առնչությամբ նախաքննության ընթացքում վարույթն իրականացնող մարմնի ներկայացրած եւ քննված միջնորդությունները: Ապա` Քոչարյանը դիմեց դատավոր Դավիթ Գրիգորյանին. «Ասում եմ սա ուղղակի, որ իմանաք, որ պատկերացում կազմեք քննության որակի մասին՝ 800-ից ավելի վկաներից միայն մեկն է ԱԱԾ-ից»: Հիշեցնենք, որ Ռոբերտ Քոչարյանի խափանման միջոց կալանքը փոխելու հարցի քննությունը կշարունակվի մայիսի 15-ին՝ 13:30-ին:
Լուիզա ՍՈՒՔԻԱՍՅԱՆ
