Այս օրերին Երեւանում էր լիսաբոնաբնակ ջութակահարուհի, «Հայրիկ Մուրադյան» մշակութային ՀԿ-ի նախագահ Նարինե Դելլալյանը: Նա երկու կարեւոր հանդիպում է ունեցել:
«Այս անգամ մենք որոշեցինք հատկապես ուսանողների հետ հանդիպումներն իրականացնել, որովհետեւ շատ կարեւոր են շփումները երիտասարդների հետ: Երկու միջոցառում արեցինք` առաջինը Կոմիտասի անվան պետական կոնսերվատորիայում` Հարություն Դելլալյանի Topophono ստեղծագործության շուրջ քննարկում եղավ: Հարցեր հնչեցին, մտորումներ եղան:
Իսկ Հայաստանի ազգային կինոկենտրոնի և Հայաստանի պետական համալսարանի մշակույթի կենտրոնի կողմից հրավիրված էինք ուսանողների հետ հանդիպման` զրուցելու Հայոց երգի նվիրյալ Հայրիկ Մուրադյանի մասին»,- Aravot.am-ի հետ զրույցում նշեց տիկին Դելլալյանը։
«Ես շատ սիրով ընունեցի ԵՊՀ մշակույթի կենտրոնի հրավերը, որովհետեւ դա նախատեսված էր հատկապես ուսանողների համար: Նախ մի փոքրիկ հատված ցուցադրեցինք Լեւոն Քալանթարի հրաշալի «Այբ, բեն, գիմ» ֆիլմից, այնուհետեւ խոսեցինք Հայրիկի մասին,թե ինչ դերակատարություն նա ուներ ազգագրական մշակույթում»,- հայտնեց երաժիշտը:
Կարդացեք նաև
Նարինե Դելլալյանը` մոր եւ Ռուբեն Բաբայանի հետ
Նարինե Դելլալյանը հավելեց. «Եղան տարբեր ելույթներ, Հասմիկ Հարությունյանը հանդես եկավ, «Վան» համույթն էր ներկա… Հետաքրքիր հարց հնչեց` «Երազ իմ երկիր հայրենի» երգի վերաբերյալ. հազարավոր մարդիկ գիտեն ճշմարտությունը, բայց մինչ այժմ այդ երգը շարունակում է մնալ այլ հեղինակով: Ես սիրով պատմեցի եղելությունը: Հենց Հայրիկի ծննդյան օրը` մայիսի 3-ին, ինչպես մեզ մոտ ավանդույթ է դարձել, Արաբկիրի համայնքապետարանի հետ միասին կազմակերպում ենք Հայրիկի ծննդյան օրը` բացօթյա համերգ, հանդիպում: Հետաքրքիր էր, որ այնտեղ հավաքված երիտասարդները երեկոյի ավարտին սկսեցին ինքնաբուխ երգել «Երազ իմ երկիր հայրենին»: Դա ապացույցն է այն բանի, որ մարդիկ գիտեն եւ դա ընդունում են որպես Հայրիկ Մուրադյանի երգ: Ի դեպ, ինչպես միշտ իմ կողքին էին «Վան», «Կարին», «Ակունք», «Մասունք» խմբերը»:
Գոհար ՀԱԿՈԲՅԱՆ
