«2008.թ-ին Ռոբերտ Քոչարյանի՝ փետրվարի 23-ին հրավիրած խորհրդակցության մասնակիցների՝ նախաքննության փուլում հարցաքննություններն ապացուցում են մեղադրյալ Ռոբերտ Քոչարյանի՝ իրեն մեղսագրվող մեղադրանքին առնչվելը»,-Մարտի մեկի գործով նախնական դատական նիստում, որի ընթացքում քննարկվում է ՀՀ սահմանադրական կարգի տապալման համար մեղադրվող Ռոբերտ Քոչարյանի խափանման միջոց կալանքը փոխելու միջնորդությունը, այսօր հայտարարեց գործով մեղադրող-դատախազ Պետրոս Պետրոսյանը:
«Կան նաեւ տեսագրություններ, զինված ուժերի զրահատեխնիկայի մասին տվյալներ եւ ՀՀ պաշտպանության նախարարության այլ գաղտնի հրամաններ, որոնց անունները չեմ հրապարակի, որոնք փաստում են, որ Ռոբեչտ Քոչարյանն առնչվում է իրեն մեղսագրվող հանցավոր արարքի կատարմանը»,-համոզմունք հայտնեց մեղադրող-դատախազը:
Նա նաեւ նշեց, որ կալանքից ազատվելու դեպքում ՀՀ երկրորդ նախագահը կարող է խուսափել դատաքննությունից կամ փախուստի դիմել. «Ըստ քրեական գործում առկա տեղեկությունների՝ նրա հիմնական գործունեության վայրը Մոսկվան է: Քննությանը խոչընդոտելու հիմքերը բարձր են»:
Հիշեցնենք, որ ըստ պաշտպանական կողմի դիրքորոշման՝ մեղադրողների պնդումներն անհիմն են, եւ երկրորդ նախագահը չի կարող քննությունից խուսափել կամ խոչընդոտող գործողություններ իրականացնել: Դատավոր Դավիթ Գրիգորյանը հարցրեց դատախազին՝ «փախուստի հավանականությունն ինչպե՞ս կհիմնավորեք, նա ձեզ դիմել է՝ ասելով, որ պատրաստվում է փախուստի դիմե՞լ»: Պետրոս Պետրոսյանը պատասխանեց. «Երկրից դուրս գալու հանգամանքով պայմանավորված՝ թաքնվելու ռիսկերը բարձր են»: Հավելենք, որ դատավոր Դավիթ Գրիգորյանը դեռ պետք է հեռանա խորհրդակցական սենյակ՝ Ռոբերտ Քոչարյանի կալանքը փոխելու վերաբերյալ միջնորդության առնչությամբ որոշում կայացնելու:
Կարդացեք նաև
Լուիզա ՍՈՒՔԻԱՍՅԱՆ
