Երկրորդ նախագահ Ռոբերտ Քոչարյանի տիկին Բելլա Քոչարյանը, Քոչարյանի հեղինակած «Կյանք եւ ազատություն» գրքի հայերեն տարբերակի շնորհանդեսին ասել էր, թե գիրքը շատ օգտակար կլինի մեր երիտասարդների համար, կարող է սովորեցնել, թե ինչքան կարեւոր է սիրել հայրենիքը. «Այնքան մեծ է հայրենասիրությունն այնտեղ, որ զարմանում ես»:
Նա ասել էր, թե այդ գիրքը պատմական իմաստ ունի եւ մեր նորագույն պատմության էջերից մեկն է. «Այնպիսի փաստեր կան, որ մեզ ստիպում են ավելի ճիշտ նայել մեր առօրյային, մեր իրականությանը: Գիրքը չի թողնում, որ մենք շփոթվենք»:
Այսօր ԱԺ ճեպազրույցների ժամանակ մենք հետաքրքրվեցինք ԲՀԿ պատգամավորներից, թե Քոչարյանի այդ կարեւոր գիրքը կարդացե՞լ են: Իվետա Տոնոյանը պատասխանեց, որ դեռեւս չի հասցրել կարդալ: Մտադի՞ր է կարդալ՝ մեր հարցին Տոնոյանը պատասխանեց. «Ես ընդհանրապես, եթե ժամանակ ունենում եմ, ցանկացած գրականություն՝ հատկապես նոր տպագրված, աշխատում եմ կարդալ: Հիմա Մակրոնի «Հեղափոխությունն» եմ կարդում, ավարտելուց հետո կմտածեմ»: Վարչապետ Նիկոլ Փաշինյանի հեղինակած «Երկրի հակառակ կողմը» գիրքը նույնպես չէր կարդացել. «Էնպես չի, որ պլանավորված չէ»:
Վահե Էնֆիաջյանն ասաց, որ ամառվա ընթացքում ավելի քիչ ծանրաբեռնված կլինեն, ու որոշ գրքեր կան, որ իրոք ցանկանում է ու կկարդա:
Կարդացեք նաև
«Լուսավոր Հայաստան» խմբակցության պատգամավոր Գեւորգ Գորգիսյանն ասաց, որ ինքն էլ չի կարդացել Քոչարյանի գիրքը: Հարցրեցինք՝ մտադի՞ր եք կարդալ, Գորգիսյանն այսպիսի պատասխան տվեց. «Հակառակորդին պետք է լավ ճանաչել, զուտ այդ պատճառով արժի ընթերցել»:
Հարցին՝ Քոչարյանին հակառակո՞րդ եք անվանում, նա պատասխանեց. «Քաղաքական դաշտ մտնելու փորձեր անող ցանկացած մարդ ունի ինչ-որ նկրտումներ: Հաշվի առնելով նաեւ, որ նախկին ռեժիմի վերադարձի փորձ նա կարող է լինել, իհարկե, կարելի է հասկանալու համար նրանց մոտիվները, գործելաոճը՝ կարդալ»:
Հռիփսիմե ՋԵԲԵՋՅԱՆ
