Այսօր առողջապահության նախարար Արսեն Թորոսյանն իր պաշտոնավարման մեկ տարին ամփոփող ասուլիսին, անդրադառնալով պալիատիվ բուժօգնությանն, ասաց, որ այս պահին ցավազրկող դեղամիջոցների՝ թմրամիջոցների հետ կապված խնդիր կա, որը փորձում են ոստիկանության հետ լուծել.«Որովհետեւ իրենք հիմնականում խուսափում են ոստիկանության հետ գործ ունենալ, ոչ թե հիվանդին օգնելուց են խուսափում: Այս մասով առաջընթաց ունենք, ոստիկանությունն ավելորդ չի միջամտում բժշկական գործերին»:
Նախարարը հույս հայտնեց, որ այս տարի կհասցնեն ներդնել պալիատիվ ամբուլատոր բուժօգնությունը՝ պետության հաշվին.«Հիմա ունենք լիցենզավորված բուժհաստատություններ պալիատիվ բուժօգնության գծով, 2-ը՝ պոլիկլինկաներ են, որից մեկը դիմել է պետպատվեր ստանալու»: Թորոսյանն ասաց, որ պետպատվերը ստանալուց հետո այդ պոլիկլինիկան կկարողանա իր տարածաշրջանի ամոքիչ բուժօգնության կարիք ունեցող բնակիչներին տանը մատուցել բուժծառայություն՝ այցեր կազմակերպել, խնամել: Այս բուժօգնության ծրագրում ներառվում են սոցիալական աշխատողները, հոգեբանները:
«Մյուս տարվա ծրագրով նախատեսում ենք պալիատիվ ստացիոնար բուժօգնությունը: Հիմնականում մտածում ենք ուռուցքաբանական հիվանդների մասին: Չի բացառվում, որ ներառենք նաեւ այլ պաթոլոգիաներով հիվանդներին»,-ասաց Թորոսյանը: Նա նաեւ ասաց, որ հավանաբար այդ բուժօգնությունը կտրամադրվի ուռուցքաբանության ազգային կենտրոնում կամ այլ կենտրոնների որեւէ բաժանմունքում: Թորոսյանի վստահեցմամբ՝ առանձին կենտրոնի մասին չեն մտածում, քանի որ դա ծախսատար է, եւ դեռ դրան պատրաստ չեն:
Նելլի ԲԱԲԱՅԱՆ
