Հայաստանյան բնապահպանական կազմակերպություններն այսօր Երեւանից ավտոերթով շարժվեցին դեպի Վայոց ձոր՝ Ջերմուկում մասնակցելու տեղացիների՝ Ամուլսարի ոսկու հանքի շահագործման դեմ ուղղված հանրահավաքին: «Ամուլսարը լեռ է» խորագրով երթի մասնակիցներն ավելի ուշ տեսակցելու են Ամուլսար տանող ճանապարհներին նստացույց անողներին:
«Նրանք 11 ամիս է, ինչ այնտեղ են եւ կանգնեցրել են հանքարդյունաբերական ծրագրի աշխատանքը: Պահանջը՝ առողջ ապրելակերպ եւ տնտեսական այլընտրանքների պահպանություն: Սա վերաբերում է Գնդեվազ համայնքին եւ Ջերմուկ քաղաքին, որոնք վտանգված են Ամուլսարի ոսկու հանքի շահագործման ծրագրի պատճառով»,-լրագրողների հետ զրույցում հայտարարեց «Հայկական բնապահպանական ճակատ» նախաձեռնության անդամ Աննա Շահնազարյանը:
Նրա խոսքով՝ Ջերմուկի եւ Գնդեվազի բնակիչները եւս նստացույց անողների թվում են. «Բնակվում են փոքրիկ տնակներում՝ փակելով դեպի հանք տանող ճանապարհները: Խնդրի վրա ուշադրություն հրավիրելու այլ տարբերակ չկա: Դա խաղաղ բողոքի ամենաարդյունավետ միջոցն է»: Աննա Շահնազարյանի փոխանցմամբ՝ Վայոց ձորի 3000 բնակիչ արդեն մասնակցել է ստորագրահավաքին, որի պահանջն է՝ դադարեցնել Ամուլսարի շահագործումը:
Հիշեցնենք, որ «Լիդիան Արմենիա» ընկերության՝ Ամուլսարի շահագործման ծրագիրը կասեցված է, հարուցված է քրեական գործ. մայիսին սպասվում է շրջակա միջավայրի վրա ազդեցության միջազգային փորձաքննության արդյունքների ամփոփում:
Կարդացեք նաև
Լուիզա ՍՈՒՔԻԱՍՅԱՆ
