«Այդ ասուլիսը նախեւառաջ հաշվետվություն էր, դա շատ լավ բան էր»,-այսօր «Հայելի» ակումբում ասաց Գերագույն խորհրդի նախկին պատգամավոր Ազատ Արշակյանն՝ անդրադառնալով վարչապետ Նիկոլ Փաշինյանի ասուլիսին եւ ներկայացրած 100 փաստին: Նրա կարծիքով՝ այս մեկ տարվա ընթացքում Հայաստանի գահավիժումը, որպես պետություն, կասեցվել է. «Ես եւս 900 կետ կարող եմ ասել, որ դադարել է Հայաստանի անկումը: Անվտանգության համակարգի առումով՝ հիմա ավելի լավ վիճակում են զինված ուժերը, ավելի ճիշտ է սպառազինությունը, ավելի կարգապահ են»:
Ասուլիսին ներկա ԱԺ ԲՀԿ խմբակցության պատգամավոր Գեւորգ Պետրոսյանն էլ ասաց, որ Հայաստանում քաղաքական նոր մշակույթ է ձեւավորվում, նկատի ունենալով վարչապետի հաշվետվությունը.«Բայց ասել, որ սա այնպիսի մի հաշվետվություն էր, որը ՀՀ բնակիչների անհոգ կյանքի լիազորագիր է, սա սխալ է: Ես, որպես Հայաստանի հողին գամված քաղաքացի, կուզենայի տեսնել, այդ կետերի մեջ ի՞նչ է խոսվում Արցախի խնդրի վերաբերյալ»: Պետրոսյանն ասաց, որ ինքը առարկայական որեւէ բան չի տեսել օտարերկրյա ներդրումների ապահովվածության մասին:
Պետրոսյանի խոսքերով՝ «Ասում է՝ կառավարությունն ասել է՝ օրենքի առաջ արտոնյալներ չկան: Այդպես չէ, ես անուններ չեմ տա, կտամ եթե որեւէ մեկն ինձանից անձնապես բացատրություն պահանջի, կապացուցեմ՝ այսօր շատ մարդիկ, խոշոր սեփականատերեր, շատ մեծահարուստներ, որոնց անունները կապվում են ահռելի ունեցվածք կուտակելու հետ՝ կարճ ժամկետում եւ պաշտոնավարման օրոք, էսօր ազատության մեջ վխտում են, ու կարծես թե մենակ մի հոգի է իրանց հետաքրքրում, ու դա Գագիկ Ծառուկյանն է: Շատ չեմ ծավալվի, որ չասեն եկել է իր քաղաքական ղեկավարի շահերն է ներկայացնում: Բայց այդ քաղաքական ղեկավարն ամենից առաջ մարդ է, սեփականատեր է եւ եթե պետությունն անհարկի միջամտում է սեփականատիրոջ գործերին, մենք, որպես պատգամավոր, իրավունք չունենք չխոսենք»:
Նելլի ԲԱԲԱՅԱՆ
