Aravot.am-ը Հայաստանի պետական տնտեսագիտական համալսարանի ռեկտորի պաշտոնակատար Ռուբեն Հայրապետյանից հետաքրքրվեց` ի՞նչ կարծիքի է օրենքի այն նախագծի մասին, ըստ որի աշխատող ուսանողների եկամտահարկից փոխհատուցվելու է նրանց ուսման վարձը:
«Ընդհանուր գաղափարին տեսականորեն դեմ չեմ: Նման բան աշխարհի շատ երկրներում կիրառելի է, եւ կա տրամաբանություն, բայց այն տեսքով, ինչ տեսքով ներկայացված է, նախագիծը շատ ռիսկեր է պարունակում` հաշվի առնելով Հայաստանի իրավիճակային գործոնները:
Գաղափարը վերջնական տեսքի բերելու համար խորքային եւ համակարգային քննարկումների անհրաժեշտություն կա: Ինչպես արդեն նշեցի, կան շատ ռիսկեր, որոնք կանխելու համար պետք է մեխանիզմներ մշակել»,-ասաց ռեկտորի պաշտոնակատարը:
Մեր զրույցի ժամանակ անդրադարձ եղավ նաեւ Հայաստանի պետական տնտեսագիտական համալսարանում ներդրվող պրոֆեսորադասախոսական անձնակազմի վերաբերյալ ուսանողական էլեկտրոնային հարցումների հայեցակարգին, որը մայիսի 14-ին քննարկվելու է ուսանողների հետ: Ռեկտորից տեղեկացանք, որ հարցման արդյունքները վճռորոշ նշանակություն են ունենալու պարգեւատրման չափի տարբերակման գործում, իսկ հարցման արդյունքներով ծայրահեղ շեմը չհաղթահարելու դեպքում տվյալ դասախոսի հետ պայմանագիրը լուծվելու է:
Կարդացեք նաև
Տեղեկացանք նաեւ, որ հարցումն անանուն է լինելու, եւ դրան կարող են մասնակցել միայն նախորդ կիսամյակի քննաշրջանի արդյունքում 66 % եւ ավել միջին որակավորման գնահատական ունեցող ուսանողները:
Գոհար ՀԱԿՈԲՅԱՆ
Ռուբեն Հայրապետյանի լուսանկարը ` տնտեսագիտական համալսարանի asue.am կայքից:
