«ԱՌԴԱ» բարեգործական հիմնադրամը Գյումրիում շարունակելու է սոցիալական բնակարանների կառուցումը․ առաջիկայում կիսակառույց շենքերում մեկում 18 սոցիալական բնակարան կկառուցի, որից 14-ը լինելու է մեկ սենյականոց, 4-ը՝ երկու սենյականոց։ Ընդհանուր գումարը կազմում է 157 միլիոն 412 հազար դրամ, որից 15 տոկոսը՝ 29 միլիոն 612 հազարը հատկացվելու է քաղաքապետարանի բյուջեից։
Այսօր այս մասին հայտարարեց Գյումրու քաղաքապետ Սամվել Բալասանյանը, որը սոցիալական բնակարանաշինության 3-րդ փուլի մասով պայմանագիր ստորագրեց «ԱՌԴԱ» բարեգործական հիմնադրամի գործադիր տնօրեն Հրահատ Ստեփանյանի հետ։ Գյումրու քաղաքապետն ասաց, որ շինաշխատանքները կփորձեն ավարտել տարվա վերջին։
«Ասում են՝ էլի լավ նորություն Գյումրիում»,-իր խոսքն այսպես սկսեց Գյումրու քաղաքապետը։
«ԱՌԴԱ» բարեգործական հիմնադրամի գործադիր տնօրեն Հրահատ Ստեփանյանն էլ նշեց, որ սա հիմնադրամի ամենահաջողված ծրագրերից է, և եթե չլիներ փոխադարձ վստահություն, կյանքի, բնականաբար, չէր կոչվի։
Կարդացեք նաև
Գյումրու քաղաքապետը նաև ասաց, որ որոշ չափորոշիչներ են փոխելու պայմանագրում, քանի որ տնակներում ապրող միայնակ ծերեր քիչ են մնացել։
Սամվել Բալասանյանը նաև տեղեկացրեց, որ թե՛ կառավարությունը, և՛ թե «Հայաստան» համահայկական հիմնադրամը ևս մտադրված են լուծելու շահառուներին տնակներից ձերբազատելու խնդիրը։ «Հայաստան» համահայկական հիմնադրամը ևս ցանկություն ունի մեկ կիսակառույց վերցնել ու կառուցել։
Նունե ԱՐԵՎՇԱՏՅԱՆ
