ԱԺ-ում այսօր ՀՀ Դատախազության 2018թ.-ի գործունեության քննարկման ժամանակ «Իմ քայլը» խմբակցության պատգամավոր Էդգար Առաքելյանը ՀՀ գլխավոր դատախազ Արթուր Դավթյանին հարցրեց. «Հաշվի առնելով այն փաստը, որ նախորդ տարի, ըստ դատախազության զեկույցի, 470 պաշտոնյաների դեմ քրեական գործեր են հարուցվել՝ կոռուպցիոն գործողություններին առնչվող մեղադրանքներով, կխնդրեի ներկայացնել, թե արդյոք քրեական հետապնդման ենթարկված դատախազներ եղե՞լ են»:
Արթուր Դավթյանը հայտնեց, որ 2018թ.-ին քրեական հետապնդման ենթարկված գործող դատախազ չի եղել, այս պահին մեկ դատախազի հանդեպ է քրեական հետապնդում իրականացվում. «Ամենակարեւորը բարոյահոգեբանական մթնոլորտի ձեւավորումն է: Դա ենթադրում է զրո հանդուրժողականություն՝ կոռուպցիայի հանդեպ: Դա մեզ էլ է վերաբերում: Թող անհամեստ չհնչի, բայց դատախազության համակարգում հաջողվել է այդպիսի մթնոլորտ ձեւավորել»:
Էդգար Առաքելյանը շարունակեց. «Դեռեւս խորհրդային ժամանակներից հանրության շրջանում հայտնի մոտեցումը, թե դատախազներն ամենակոռումպացված, կամ, ժողովրդական լեզվով ասած՝ «տռզած» պաշտոնյաներն են, այլեւս վերացա՞ծ է, դատախազներն այլեւս սրբե՞ր են»: Արթուր Դավթյանն այսպես արձագանքեց. «Չեմ կարծում, թե մարդիկ երկու տեսակի են լինում՝ սրբեր եւ կոռուպցիոներներ: Երկրի վրա ինձ սրբեր հայտնի չեն, այդ թվում՝ դատախազներ: Բայց ինչ վերաբերում է ձեր ասածին, պաշտոնապես հայտարարում եմ՝ ներկայիս դատախազությունում դա բացառված է: Առաջինն իմ օրինակով կարող եմ փաստել»:
Լուիզա ՍՈՒՔԻԱՍՅԱՆ
