«Իրենք անցյալ են ու անցյալ էլ մնալու են իրենց` հողեր, Մեղրի և մնացած բաներ հանձնելու տրամաբանության մեջ»,- Aravot.am-ի հարցին՝ այս հաղթական տրամաբանության ֆոնի վրա ինչպե՞ս կգնահատի հողեր հանձնելու մասին դեռևս շարունակվող խոսակցությունները, «Անմահ գունդը» խորագրով քայլերթին այսպես արձագանքեց ՀՀ ԱԺ փոխնախագահ Ալեն Սիմոնյանը:
4-րդ տարին անընդմեջ անցկացվող քայլերթը կազմակերպեց «Հայաստանի Անմահ գունդ» հայրենասիրական հասարակական կազմակերպությունը՝ ՀՀ պաշտպանության նախարարության հետ համատեղ:
Քայլերթը մեկնարկեց Արամ Խաչատրյանի արձանի մոտից, այնուհետև ընթացավ Մաշտոցի պողոտայով, քայլերթի մասնակիցները հետո թեքվեցին Ամիրյան փողոց, Հանրապետության հրապարակից թեքվեցին Վազգեն Սարգսյան փողոց ու մուտք գործեցին Կիրովի անվան այգի, որտեղ Նելսոն Ստեփանյանի արձանի մոտ դրեցին ծաղիկներ ու լուսանկարներ:
Քայլերթին մասնակցեցին նաև Երևանի քաղաքապետ Հայկ Մարությանը, ՀՀ ԱԺ փոխնախագահ Ալեն Սիմոնյանը, ԲՀԿ խմբակցության պատգամավորներ, այլ քաղաքական ուժերի ներկայացուցիչներ, քաղաքացիներ, որոնց հարազատները մասնակցել են Հայրենական Մեծ պատերազմին:
Շարունակելով մեր հարցին պատասխանել՝ Ալեն Սիմոնյանը պահանջեց այլևս երբեք չարտաբերել հողեր հանձնել արտահայտությունը և ասաց. «Էդ ո՞վ է այդպիսի բաներ խոսում. Ռոբերտ Քոչարյա՞նն է այդպիսի բաներ խոսում, թե՞ Սերժ Սարգսյանը: Չլսեմ որևէ քաղաքական գործչից հողերը հանձնելու մասին որևէ խոսք: ՀՀ-ում ու այստեղ կանգնած մարդկանց մեջ տենց մարդ չկա, որ հողերը հանձնելու մասին նույնիսկ խոսում է: Թող իրենք մնացածին չփորձեն վերագրել: Իրենք անցյալ են ու անցյալ էլ մնալու են իրենց՝ հողեր, Մեղրի և մնացած բաներ հանձնելու տրամաբանության մեջ: Հաջողություն իրենց ընդհանրապես քաղաքական դաշտից»:
ՀՀ ԱԺ փոխնախագահն ասաց, որ Հայրենական Մեծ պատերազմի մասին հուշեր, պատմություններ չունի, քանի որ իր նախնիները Կարսից են: Տոնի մասին ասաց, որ մեր ազգի որակի և տեսակի հաղթանակն է:
Տաթև ՀԱՐՈՒԹՅՈՒՆՅԱՆ
