«Լուսավոր Հայաստան» խմբակցության պատգամավոր Արմեն Եղիազարյանն այսօր ԱԺ-կառավարություն հարցուպատասխանի ժամանակ վարչապետ Նիկոլ Փաշինյանի ուշադրությունը հրավիրեց այն հանգամանքի վրա, որ գազալցակայաններում գազի մեկ կիլոգրամի գինը թանկացել է: Նա նախ հիշեցրեց, որ վերջերս ԱԺ-ն «կողմ» քվեարկեց այն նախագծին, որի համաձայն՝ գազալցակայաններում գազը մայիսի մեկից վաճառվելու է ոչ թե խորանարդ/մետրով, այլ կիլոգրամով:
«Կառավարությունը մեզ հավաստիացրեց, որ գազի գնի փոփոխություն տեղի չի ունենա: Բայց մայիսին գազալցակայաններում գազի գինը թանկացել է 10-20%-ով: Կամ կառավարությունն այս ամբիոնից մեզ ապատեղեկատվություն տվեց, կամ չկարողացավ տիրապետել իրավիճակին: Ի դեպ, բենզինն այս օրերին եւս թանկացել է՝ երեսուն դրամով»,-հայտնեց Արմեն Եղիազարյանը:
Նիկոլ Փաշինյանը պատասխանեց, որ խնդրի մասին զրուցել է ՊԵԿ նախագահի հետ. «Ինձ հավաստիացրել են, որ բոլոր հաշվարկները ճիշտ են: Գազալցակայանների 70 տոկոսում խնդիր չկա, այն առկա է մնացած հատվածում: Հանձնարարել եմ, որ շուկայի վերահսկողական տեսչությունն ավելի խորն ուսումնասիրի հարցը: Ինձ խոստացել են մեկ շաբաթում պատասխանել եւ վստահեցրել են, որ իրենց հաշվարկները ճիշտ էին, գազի գինը չպետք է թանկանար»:
Լուիզա ՍՈՒՔԻԱՍՅԱՆ
