Խորհրդարանն այսօր քննարկում է կառավարության ներկայացրած՝ «Հարկային օրենսգրքում լրացում կատարելու մասին» օրենքի նախագիծն առաջին ընթերցմամբ ընդունելու հարցը: Այս նախագծի կարգավորումը վերաբերում է էլեկտրական շարժիչով աշխատող մեքենաներին:
ՀՀ Բնապահպանության նախարար Էրիկ Գրիգորյանը հայտարարեց. «Նախագծով առաջարկվում է մինչեւ 2022թ. հունվարի մեկն ավելացված արժեքի հարկից ազատել բացառապես էլեկտրական շարժիչով շահագործվող մեքենաների ներմուծումը եւ օտարումը»: Նախարարը նշեց, որ խոսքը մինչեւ տասը ուղեւորի համար նախատեսված մեքենաների մասին է, որոնք ամբողջությամբ աշխատում են էլեկտրական շարժիչով, նաեւ՝ մոտոցիկլետների եւ մոպեդների: Օրինագիծը չի վերաբերում հիբրիդային շարժիչով մեքենաներին, քանի որ դրանք կարող են շահագործվել այդ թվում` վառելիքով:
«Նպատակը բնապահպանական է՝ միտված շրջակա միջավայրի աղտոտման նվազեցմանը: Նախագծի ընդունումը կխթանի նաեւ էներգետիկ անվտանգության զարգացումը»,-եզրափակեց Էրիկ Գրիգորյանը:
Լուիզա ՍՈՒՔԻԱՍՅԱՆ
