Խորհրդարանն այսօր քննարկեց «ՀՀ Քրեական օրենսգրքում փոփոխություններ» կատարելու մասին օրինագիծն առաջին ընթերցմամբ ընդունելու հարցը: Այս օրինագծով առաջարկվում է քրեորեն պատժելի համարել ձերբակալված կամ կալանավորված անձի փախուստը՝ անկախ այն հանգամանքից, թե որտեղից է նա դիմել փախուստի:
Արդարադատության նախարարի առաջին տեղակալ Արտակ Ասատրյանը հայտարարեց, որ ՔԿՀ-ներից փախուստի դիմելու համար քրեական պատասխանատվություն է սահմանված, բայց եղել են դեպքեր, երբ կալանավորները փախուստի են դիմել ոչ թե ՔԿՀ-ներից, այլ քաղաքացիական հիվանդանոցներից, դատարանի շենքից, ոստիկանական ուղեկցող մեքենայից. «Այս արարքների որակման հետ կապված խնդիրներ են առաջացել, ուստի անձի կարգավիճակը չի փոխվում, բայց առաջարկում ենք նրա արարքին գնահատական տալ»:
ԱԺ պետաիրավական հարցերի հանձնաժողովի անդամ Սերգեյ Ատոմյանը կարծիք հայտնեց, որ օրինագիծը շատ կարեւոր է իրավական բացը լրացնելու համար. «Փոփոխությունը կայանում է նրանում, որ փախուստի դիմածը քրեական պատասխանատվության է ենթարկվելու»:
Հավելենք, որ օրինագիծը դեռ պետք է դրվի քվեարկության եւ անցնի առաջին ընթերցում:
Կարդացեք նաև
Լուիզա ՍՈՒՔԻԱՍՅԱՆ
