Խորհրդարանն այսօր երկրորդ ընթերցմամբ եւ ամբողջությամբ ընդունեց «Կառավարության կառուցվածքի եւ գործունեության մասին» ՀՀ օրենքում փոփոխություններ կատարելու մասին օրինագիծը, որը ենթադրում է կառավարության կառուցվածքի օպտիմալացում` նախարարությունների կրճատում եւ միավորում:
Մինչ քվեարկությունը ԲՀԿ պատգամավոր Միքայել Մելքումյանը հայտարարեց, որ ԲՀԿ-ն «դեմ» է քվեարկելու՝ լինելով սկզբունքային. «Այս կառուցվածքը չի տալիս այն պատասխանները, որոնք հեղափոխության արդյունքում պետք է փոփոխությունների բերեին»:
«Լուսավոր Հայաստան» խմբակցության պատգամավոր Էդմոն Մարուքյանն էլ իր հերթին հայտարարեց. «Մենք հույս ունեինք կառուցողական աշխատանքի, երկար աշխատել էինք մեր առաջարկների վրա, բայց քննարկումները պտուղ չտվեցին»:
Ապա Մարուքյանը դիմեց ՀՀ քաղաքացիներին. «Ամռան հանգիստ ամիսներին մեծ կրճատումներ են սպասվում, զգուշացնում եմ: Դրանք չեն լինելու ուռճացված հաստիքների կրճատումներ, ինչպես փորձն է ցույց տալիս: Մենք «դեմ» ենք քվեարկելու՝ վստահ լինելով, որ այս կառուցվածքը երկար չի դիմանալու»:
Կարդացեք նաև
«Իմ քայլը» խմբակցության ղեկավար Լիլիթ Մակունցը նշեց, որ մյուս քաղաքական ուժերի առանձին առաջարկները դիտարկել են. «Արդեն հայտարարել ենք, թե որքան մարդ է հայտնվելու կադրային ռեզերվում՝ մի քանի տասնյակ: Խնդրում եմ խուճապ առաջացնող հայտարարություններ մի արեք»:
Նախագծին «կողմ» քվեարկեց 79, «դեմ»՝ 41, եւ «ձեռնպահ»՝ 1 պատգամավոր:
Լուիզա ՍՈՒՔԻԱՍՅԱՆ
