Բակո Սահակյանն ու Արկադի Ղուկասյանը դիմել են գլխավոր դատախազին՝ խնդրելով մայիսի 9-ին ընդառաջ փոխել երկրորդ նախագահ Ռոբերտ Քոչարյանի խափանման միջոցը եւ նրան ազատ արձակել՝ երաշխավորելով նրա համար:
Aravot.am-ի հետ զրույցում «Իմ քայլը» խմբակցության պատգամավոր Թագուհի Թովմասյանն այս առնչությամբ հարցին, թե ի՞նչ քաղաքական ենթատեքստ ունի սա՝ պատասխանեց. «Կարծում եմ, քաղաքական ենթատեքստ չկա այն իմաստով, որ Արցախի հանրապետության երկու նախագահները Արցախի հանրապետության նախկին նախագահի համար փորձում են երաշխավորել եւ սա, կարծում եմ, պետք է դիտարկել կոլեգիալության տեսանկյունից, ուղղակի մարդիկ գործընկերային համերաշխություն են ցուցաբերում՝ իրենց երաշխավորությամբ»:
Տիկին Թովմասյանը հույս հայտնեց, որ վաղը, երբ գլխավոր դատախազը Ազգային ժողով գա, անձամբ իրենից կկարողանան պատասխան ակնկալել՝ ընդառաջելո՞ւ է եւ ընդունելո՞ւ է երաշխավորության այդ դիմումը, թե՞ ոչ:
Հարցին՝ դիմումում նախագահները շեշտում են այն հանգամանքը, որ երեք ղեկավարներով կուզենային մայիսի 9-ին միասին լինել, նշել, բայց նախկինում միշտ չէ, որ մայիսի 9-ին Ռոբերտ Քոչարյանը ներկա է եղել Ղարաբաղում մայիսյան միջոցառումներին, հետեւաբար անհրաժեշտություն տեսնո՞ւմ եք, որ անպայման Ռոբերտ Քոչարյանը հայտնվի ազատության մեջ եւ այդ օրը լինի այնտեղ՝ Թագուհի Թովմասյանը պատասխանեց. «Եթե ես անհրաժեշտություն տեսնեի, երեւի ես կդիմեի երաշխավորության հարցով: Թերեւս անհրաժեշտությունը տեսել են նախագահները»:
Կարդացեք նաև
Հարցրեցինք՝ ամեն դեպքում այստեղ քաղաքական որեւէ ենթատեքստ չե՞ք տեսնում, չէ՞ որ նախագահներն իրենք քաղաքական մարդիկ են եւ իրենց արարքում քաղաքականություն կա՝ նա պատասխանեց. «Եթե քաղաքական ենթատեքստ փորձեի գտնել կամ քաղաքական հարթության մեջ հարցը դիտարկել, երեւի թե իրենք էլ հարցն այդպես չեն դիտարկել, այլապես կդիմեին քաղաքական ղեկավարությանը, այլ ոչ թե Հայաստանի իրավապահ մարմիններին»:
Հետաքրքրվեցինք՝ դուք անձամբ կուզենայի՞ք Քոչարյանին ազատության մեջ տեսնել՝ Թագուհի Թովմասյանը պատասխանեց. «Ես ընդհանրապես իմ անձնական տեսակետը աշխատում եմ գոնե քաղաքական հարցերի վերաբերյալ չխառնել, որովհետեւ դրանք քաղաքական տեսակետներ են»:
Մեր դիտարկմանը, որ դուք քաղաքական մարմնի ներկայացուցիչ եք՝ իշխող ուժից նա արձագանքեց. «Բայց քաղաքական տեսակետ չեմ ուզում հայտնել»:
Հռիփսիմե ՋԵԲԵՋՅԱՆ
