Ծաղկաձորում այսօր աշխատանքը սկսեց «Շախմատի կրթության արդի վիճակը եւ զարգացման միտումները» խորագրով միջազգային գիտաժողովը, որին մասնակցում են ՖԻԴԵ-ի, համաշխարհային շախմատի նշանավոր գործիչներ եւ 20-ից ավելի երկրների ներկայացուցիչներ:
Դիմելով գիտաժողովի մասնակիցներին՝ ՀՀ գիտության, կրթության, մշակույթի, սպորտի եւ երիտասարդության հարցերի նախարար Արայիկ Հարությունյանը նշեց, որ ցանկացած նորարարության, որ կա կրթական ոլորտում, դրական եւ բացասական ազդեցությունները երեւում են տարիներ հետո: Բայց կարեւոր է հետեւել դրա ընթացքին եւ հընթացս առաջացած հարցերին լուծումներ տալ: «Ինձ համար շատ ուրախալի է, որ իմ գործընկերների հետ քննարկումների ժամանակ նրանք մեծ հետաքրքրություն են ցուցաբերում հանրակրթության ոլորտում շախմատ առարկան ներդնելու վերաբերյալ: Մի շարք գործընկերների հետ քննարկել ենք համագործակցության հնարավորությունը: Նրանք հետաքրքրված են այս առարկան նաեւ իրենց երկրներում ներդնելու համար, եւ այստեղ մեր մասնագետները շատ օգտակար կլինեն:
Մենք պարոն Սմբատ Լպուտյանի, առարկան ներդնողների հետ ունեցել ենք քննարկումներ: Կուզեմ նաեւ, որ այս գիտաժողովի ընթացքում էլ քննարկումներ լինեն այն խնդիրների վերաբերյալ, որոնք մասնավորապես բարձրացնում են աշակերտների ծնողները, ուսուցիչները: Մենք պարոն Լպուտյանի հետ արձանագրել ենք մի շարք հարցեր, որոնք, կարծում եմ, կարճ ժամանակ հետո լուծումներ կստանան եւ առարկայի ներդնումն ավելի արդյունավետ կլինի: Դրանք մասնավորապես վերաբերում են առարկայի դասավանդման մեթոդներին եւ վերապատրաստումներին: Կարծում եմ, այդ խնդիրները չառաջանալ չէին էլ կարող, որովհետեւ եղել է առարկայի լայնածավալ ներդնում եւ ցանկացած նմանատիպ մեծ ձեռնարկների դեպքում նման հարցեր առաջանում են:
Բոլորիդ հաջող քննարկումներ եմ մաղթում այս գիտաժողովի շրջանակում եւ կարծում եմ, բոլոր այն արդյունքները, որոնք կլինեն, նոր թափ կհաղորդեն կրթության մեջ շախմատ առարկայի ներդրումին», -ասաց նախարարը:
Կարդացեք նաև
Աշոտ ՀԱԿՈԲՅԱՆ
