ԱԺ-ն այսօր քննարկեց «Իմ քայլը» խմբակցության պատգամավոր, Կրթության եւ գիտության նախկին փոխնախարար Հովհաննես Հովհաննիսյանի ներկայացրած՝ «Գովազդի մասին ՀՀ օրենքում» փոփոխություններ կատարելու մասին օրենքի նախագիծը երկրորդ ընթերցմամբ եւ ամբողջությամբ ընդունելու հարցը:
Հիշեցնենք, որ այս օրինագծով արգելվում է ռեֆերատների, կուրսայինների եւ դիպլոմայինների գովազդը: Հովհաննես Հովհաննիսյանը հայտարարեց. «Գիտական եւ ուսանողական հանրույթը դրական է արձագանքել այս նախագծին: Մեզ անգամ նկարներ են ուղարկում, որ կազմակերպություններն արդեն հանում են իրենց գովազդային վահանակները՝ չսպասելով օրենքի երկրորդ ընթերցմանը»:
«Իմ քայլի» պատգամավոր Սոֆյա Հովսեփյանն էլ իր հերթին նշեց՝ տեղեկություններ կան, որ դասախոսական կազմը եւս ներգրավվում է ռեֆերատների եւ կուրսայինների ծառայությունների մատուցման աշխատանքին. «Սա պետք է բացառել, ոչ թե թույլ տալ»:
Կարդացեք նաև
Կրթության եւ գիտության փոխնախարար Արեւիկ Անափիոսյանն էլ ընդգծեց. «Կառավարության դիրքորոշումն այն է, որ այս օրինագիծն անհրաժեշտ, բայց ոչ բավարար քայլ է: Մշակվում է նաեւ «Բարձրագույն կրթության մասին» օրենքի նախագիծ, որը նաեւ գրագողության դեպքերի համար պատժամիջոցներ է պարունակում»:
Հավելենք, որ օրինագիծը դեռ պետք է դրվի քվեարկության եւ անցնի երկրորդ ընթերցում:
Լուիզա ՍՈՒՔԻԱՍՅԱՆ
