Ռուսաստանի Կրասնոդարի երկրամասում ապրող ազգությամբ հայ իրավապաշտպան Ալբերտ Գայամյանը փաստաթղթեր է ներկայացրել, որում ապացուցվում է նրա՝ Ռուսաստանի քաղաքացիությունը:
Ալբերտ Գայամյանը ծնվել է Բաքվում, ծառայել է Գերմանիայում և այժմ ապրում է Կրասնոդարում՝ ծավալելով լրագրողական և իրավապաշտպան գործունեություն:
Չնայած նրան, որ Գայամյանի անձնագիրը, վարորդական իրավունքը և մյուս բոլոր փաստաթղթերը ստացվել են Կուբանի մայրաքաղաքում, իշխանությունները չեն ընդունում նրա քաղաքացիությունը և առաջարկում են դիմել ՆԳՆ՝ քաղաքացիություն ստանալու հայցով:
2016թ. աշնանը Գայամյանը դիմել է այդ քայլին՝ նախապես դա համաձայնեցնելով ՆԳՆ բարձրաստիճան պաշտոնյաների հետ, սակայն 2017թ. գարնանը նրան հայտնել են, որ դիմումը մերժվել է:
2019թ. մարտի 19-ին Գայամյանը դիմել է Ռուսաստանի նախագահ Վլադիմիր Պուտինին՝ խնդրանքով օժանդակել իր տեղափոխմանը կամ իր արտաքսմանը Ստեփանակերտ: Սակայն ապրիլի 23-ին նա պատասխան է ստացել, որում ասվում է, թե «Ռուսաստանի Դաշնության սահմանը հատելու համար անհրաժեշտ փաստաթղթերը ստանալու համար Դուք պետք է դիմեք Ադրբեջանի Հանրապետության դեսպանատուն»:
Պատրաստեց՝ Վիկտորյա ԱՆԴՐԵԱՍՅԱՆԸ
